వ్యక్తిగత బాగోగుల విషయంలో వెనకబడిపోతే ఎలా...?

మార్చి 8న ప్రపంచ మహిళా దినోత్సవం అని మనకందరికీ తెలిసిందే. మహిళల సామాజిక, రాజకీయ, సాంస్కృతిక, ఆర్థిక విజయాలకు చిహ్నంగా ప్రపంచవ్యాప్తంగా ఈ రోజుని ఘనంగా జరుపుకుంటారు. స్త్రీలు హుందాతనానికి ప్రతీక. వారు ప్రతి వ్యక్తి జీవితంలో ఉత్సాహం నింపుతారు. అటువంటివారు జీవితంలో వ్యక్తిగత బాగోగుల విషయంలో వెనకబడిపోతే ఎలా...? స్త్రీలు తమ జీవనసరళిలో అతిసులువైన మార్పులు చేసుకుంటే... మెరుగైన శారీరక, మానసిక ఆరోగ్యం సొంతం చేసుకోవచ్చు.

స్త్రీలు తమ జీవన సరళిలో కొన్ని మార్పులు చేసుకోవటం ఫలితంగా మెరుగైన శారీరక, మానసిక ఆరోగ్యం సొంతం చేసుకోవచ్చని చాలా పరిశోధనల్లో తేలాయి. చిన్నచిన్న దురలవాట్లయినా కానీయండి.. ప్రతికూల ఆలోచనలు కానీయండి.. స్త్రీల ఆరోగ్యంపై దుష్పరిణామాలు చూపుతాయి. పురుషులతో పోల్చితే... స్త్రీల దైనందిన కార్యక్రమాలకు అంతు ఉండదు. అందుకే వారు తమ ఆరోగ్యం, శారీరక ధారుడ్యం విషయంలో అప్రమత్తంగా ఉండాలి. పలు అలవాట్లను తమ జీవితంలో భాగం చేసుకోవాలి. వాటిలో కొన్ని మీ కోసం!

అల్పాహారం తప్పనిసరి: దృఢంగా ఉండటానికి ప్రతిరోజు తప్పనిసరిగా బ్రేక్​ఫాస్ట్ అవసరం. పోషకాలతో కూడిన అల్పాహారాన్ని తినడం వల్ల దైనందిన కార్యకలాపాలకు అవసరమయ్యే శక్తి లభిస్తుంది. జీవక్రియ మెరుగవుతుంది. పొద్దుటి ఆహారంగా గుడ్లతో పాలకూర లేదా ఆకుకూరలు, కూరగాయలతో చేసినవి తీసుకుంటే మంచిది.

చిరుతిళ్లు అవసరమే: ఆరోగ్యవంతమైన జీవితానికి ఉదయం, మధ్యాహ్నం, రాత్రి ప్రొటిన్ ఫుడ్ తీసుకోవాలి. డైటింగ్ పేరుతో కడుపు మాడ్చుకోకుండా ఆకలైనప్పుడల్లా తినాలి. కొవ్వులున్న, ప్రోటీన్ల చిరుతిళ్లు తింటే మంచిది.

శరీరాకృతి కోసం: స్త్రీలు నిద్రలేచింది మొదలు పడుకునే వరకు అనేక పనులు చేస్తారు. కుటుంబ, వ్యక్తిగత, ఆఫీస్ పనులు చేపేటప్పుడు వీలైనంత వరకు ఎలాంటి మిషన్లపై ఆధారపడకుండా ఉండాలి. ఉదయం ఇంట్లో కూరగాయలు అవసరం.. కాబట్టి నడుచుకుంటూ వెళ్లి తెచ్చుకోవడం ఉత్తమం. ఆఫీస్​కు వెళ్లినప్పుడు చాలామంది లిఫ్ట్​లో వెళ్తారు. అలా కాకుండా మొదటి, రెండో ఫ్లోర్​కు వెళ్లడానికి మెట్లెక్కడం మంచిది. ఇలా చేయడం ఫలితంగా మంచి శరీరాకృతి వస్తుంది.

నిద్ర చాలా ముఖ్యం: మంచి ఆరోగ్యానికి పోషకాహారం మాత్రమే కాదు కంటి నిండా నిద్ర అవసరమే. అవసరమైనంత సమయం నిద్ర పోకపోతే నీరసం, చికాకు సమస్యలొస్తాయి. మెదడు సరిగా పనిచేయదు. ఈ ప్రభావం ఇటు ఇంట్లో వ్యక్తులపై, అటు ఆఫీసులో కొలిగ్స్​పై చూపే ప్రమాదం ఉంటుంది. అందుకే సగటున ఆరున్నర గంటల నుంచి... ఏడున్నర గంటలు నిద్ర అవసరం

నవ్వడం యోగం: మనస్ఫూర్తిగా నవ్వటం వల్ల ఒత్తిడి తగ్గుతుంది. ఒత్తిడికి గురైనప్పుడు శరీరం గ్లూకోస్ విడుదలను ప్రోత్సహిస్తుంది. అధికంగా విడుదలైన గ్లూకోస్ ఇన్సులిన్​గా తర్వాత కొవ్వుగా మారుతుంది. ఎల్లప్పుడు ఉల్లాసంగా ఉండే ప్రయత్నం చేయాలి.

జిమ్ ఒక్కటే సరిపోదు: స్టిఫ్​గా ఉండటానికి కేవలం జిమ్​కి వెళ్లడమే కాకుండా... ఇతర వ్యాపకాలపై దృష్టి సారిస్తే మంచిది. పాత స్నేహితులను కలవడం, ఈత కొట్టడం, తోటపని చేయడం, క్రీడల్లో పాల్గొనడం, యోగా చేయడం వలన హృద్రోగ సమస్యలు తలెత్తే అవకాశం తక్కువ.

అతి ఆలోచన ప్రమాదమే: స్త్రీలు సహజంగానే మృదుస్వభావం కలిగి ఉంటారు. ఇంట్లోగాని, ఆఫీసులో గాని ఏదైనా చిన్న గొడవ అయితే చాలు... అతి ఆలోచనతో మనసు పాడు చేసుకుంటారు. అలా చేసుకోవడం కారణంగా... ఇంట్లో పిల్లలు, భర్త, ఆఫీసులో బాస్, తోటి ఉద్యోగులపై ప్రభావం పడుతుంది.

ఈ చిన్నచిన్న పనులు చేస్తే... స్త్రీ అందంగా, ఆరోగ్యంగా, సంతోషంగా ఉంటుంది. స్త్రీ సంతోషంగా ఉన్న సమాజం వర్థిల్లుతుంది.!