స్వర్ణ ప్యాలెస్ అగ్నిప్రమాద ఘటనలో రమేష్ ఆసుపత్రి ఎండీ డా. రమేష్ బాబు, ఛైర్మన్ సీతారామమోహన్ హైకోర్టులో దాఖలు చేసిన క్వాష్ పిటిషన్లపై ఈ రోజు విచారణ జరిగింది. స్వర్ణ ప్యాలెస్ కొన్నేళ్లుగా నగరంలో హోటల్గా కొనసాగుతుందని పిటిషనర్ తరఫున సీనియర్ న్యాయవాది దుమ్మాలపాటి శ్రీనివాస్ వాదించారు. స్వర్ణప్యాలెస్లో కొవిడ్ కేర్ సెంటర్ నిర్వహించేందుకు జిల్లా వైద్యాధికారి అనుమతినిచ్చినట్లు ధర్మాసనం దృష్టికి తీసుకెళ్లారు. గతంలో ఈ హోటల్లో ఎయిర్ పోర్ట్ క్వారంటైన్ నిర్వహించారని తెలిపారు. కొవిడ్ కేంద్రంలో జరిగిన ప్రమాద ఘటనతో రమేశ్ ఆసుపత్రి యాజమన్యానికి సంబంధం లేదన్నారు. ఈ అంశాలను పరిగణనలోకి తీసుకుని పోలీసులు నమోదు చేసిన కేసులో తదుపరి చర్యలను నిలువరిస్తూ మధ్యంతర ఉత్తర్వులు ఇవ్వాలని న్యాయవాది శ్రీనివాస్ కోరారు.
ఈ విచారణలో భాగంగా ధర్మాసనం కొన్ని కీలక వ్యాఖ్యలు చేసింది. కొవిడ్ కేర్ సెంటర్ నిర్వహించేందుకు కలెక్టర్, సబ్ కలెక్టర్ అనుమతినిచ్చారు కదా? వారిని ఈ కేసులో ఎందుకు చేర్చకూడదు? అని ప్రభుత్వ న్యాయవాదిని ధర్మాసనం కోరింది. కేసు ఇంకా విచారణలో ఉందని ప్రభుత్వ న్యాయవాది తెలిపారు. ఈ సమయంలో ఈ కేసులో మధ్యంతర ఉత్తర్వులు ఇవ్వొద్దని అభ్యర్ధించారు. ఇరువురి వాదనలను పరిగణనలోకి తీసుకున్న న్యాయస్థానం ఆసుపత్రి యాజమాన్యంపై నమోదు చేసిన కేసులో తదుపరి చర్యలను నిలువరిస్తూ మధ్యంతర ఉత్తర్వులను జారీ చేసింది.
విజయవాడ స్వర్ణప్యాలెస్లో ఈ నెల 9వ తేదీన తెల్లవారుజామున అగ్నిప్రమాదం జరిగింది. ఈ ఘటనపై గవర్నర్పేట్ పోలీస్ స్టేషన్లో కేసు నమోదైన విషయం తెలిసిందే.
ఇదీ చదవండి: భారత్‌లో రెండోదశకు ఆక్స్‌ఫర్డ్ వ్యాక్సిన్‌
