'ప్రభుత్వం మారినప్పుడల్లా విధాన నిర్ణయాల మార్పు తగదు'

ప్రభుత్వాలు మారినప్పుడల్లా విధానపరమైన నిర్ణయాల్ని రాజకీయ కారణాలతో మార్చడానికి వీల్లేదని పాలనా వికేంద్రీకరణ, సీఆర్డీఏ రద్దు చట్టాలపై దాఖలైన పిటిషన్లపై సుప్రీంకోర్టు సీనియర్ న్యాయవాది బి. ఆదినారాయణరావు హైకోర్టులో వాదనలు వినిపించారు. గత ప్రభుత్వం తీసుకున్న విధానపరమైన నిర్ణయాల్ని కొత్తగా వచ్చే ప్రభుత్వం కొనసాగించాల్సిందేనని స్పష్టంచేశారు. ఈ అంశానికి సంబంధించి గతంలో సుప్రీంకోర్టు ఇచ్చిన తీర్పులను హైకోర్టు దృష్టికి తీసుకొచ్చారు. రాజధాని కోసం రైతులు భారీ స్థాయిలో వేల ఎకరాల భూముల్ని ఇవ్వడం దేశంలోనే మొదటిసారి ఆయన కోర్టుకు తెలిపారు. పూర్తి స్థాయి వాదనలు వినిపించేందుకు విచారణ మంగళవారానికి వాయిదా పడింది.

రాజధానితో ముడిపడి ఉన్న వ్యాజ్యాలపై హైకోర్టు ప్రధాన న్యాయమూర్తి జస్టిస్ జేకే మహేశ్వరి, జస్టిస్ ఎం.సత్యనారాయణ మూర్తి, జస్టిస్ ఎన్. జయసూర్యతో కూడిన త్రిసభ్య ధర్మాసనం తుది విచారణ జరుపుతోంది. పాలనా వికేంద్రీకరణ, సీఆర్డీఏ రద్దు చట్టాలను సవాలు చేస్తూ ' అమరావతి రాజధాని సమీకరణ రైతు సమాఖ్య ఉపాధ్యక్షుడు పానకాలరెడ్డి కల్లం, న్యాయవాది నరహరిశెట్టి నరసింహారావు, మరికొందరు దాఖలు చేసిన వ్యాజ్యాల్లో సీనియర్ న్యాయవాది ఆదినారాయణరావు వాదనలు వినిపించారు. పాలన వికేంద్రీకరణ, సీఆర్డీఏ రద్దు చట్టాలు రాజ్యాంగ నిబంధనలకు అనుగుణంగా లేవని ధర్మాసనం దృష్టికి తీసుకెళ్లారు. ఆ చట్టాలను చేసే అధికారం రాష్ట్ర ప్రభుత్వానికి లేదన్నారు. ఏపీ విభజన కోసం పార్లమెంట్ చేసిన చట్టం ఆధారంగా కేంద్ర ప్రభుత్వం ఏర్పాటు చేసిన శివరామకృష్ణన్ కమిటీ సిఫారుసులను పరిగణనలోకి తీసుకున్నాకే అప్పటి ప్రభుత్వం అమరావతిని రాజధానిని నిర్ణయించిందని తెలిపారు.

నిబంధనలు ఉల్లంఘన

పదేళ్ల పాటు హైదరాబాద్ తెలుగు రాష్ట్రాలకు ఉమ్మడి రాజధానిగా ఉంటుందని విభజన చట్టంలో పేర్కొన్నారన్నారు. రెండు రాష్ట్రాలతో ముడిపెడుతూ విభజన చట్టం తీసుకొచ్చారని, ఆ చట్టం తదనంతర పరిణామాల్లో రాష్ట్ర ప్రభుత్వం తన అధికారాన్ని వినియోగించి అమరావతిని రాజధానిగా నిర్ణయించిందన్నారు. ఒకసారి నిర్ణయం జరిగాక రాజధాని గురించి మరోసారి ఆలోచన చేసే ప్రశ్నే ఉత్పన్నం కాదని వాదనలు వినిపించారు. పాలన వికేంద్రీకరణ, సీఆర్డీఏ చట్టం రద్దుకు సంబంధించిన బిల్లులను శాసనమండలి ఛైర్మన్ సలహా కమిటీకి సిఫారుసు చేశాక ఆ బిల్లులను శాసనసభలో మరోసారి ప్రవేశపెట్టి ఆమోదించడం చట్ట విరుద్ధమన్నారు. ద్విసభల విధానం అమల్లో ఉన్న రాష్ట్రంలో శాసనమండలి అభిప్రాయాన్ని విస్మరించడానికి వీల్లేదని.. సెలక్టు కమిటీని ఏర్పాటు చేయకపోవడం అధికారయంత్రాంగం చేసిన పెద్ద తప్పని మండలి ఛైర్మన్ సిఫారుసులను అధికారులు తక్కువ చేసి చూడటానికి వీల్లేదన్నారు. శాసనమండలి నుంచి బిల్లులను తిరస్కరించడమో లేదా సవరణ చేయమని కోరడమో లేదా అంగీకరించడమో ఏదో ఒక నిర్ణయం వెలువడకముందే శాసనసభలో మరోమారు ప్రవేశపెట్టడం నిబంధనలను ఉల్లంఘించడమే అవుతుందని తెలిపారు. శాసనమండలి నిర్ణయం రిజర్వులో ఉండగా ఆ బిల్లులను గవర్నర్ ఆమోదించడం చెల్లుబాటు కాదని వాదించారు.

రైతుల హక్కులు హరించడమే

రాజధాని కోసం భూములివ్వాలని రాష్ట్ర ప్రభుత్వం రైతులను ఆహ్వానించిందని న్యాయవాది హైకోర్టుకు తెలిపారు. అందులో భాగంగా భూసమీకరణ, జీవనాధారమైన వేల ఎకరాల్ని ఇచ్చారని తెలిపారు. ప్రభుత్వం రైతులతో ఒప్పందం చేసుకుందని, ఆ ఒప్పందానికి చట్టబద్ధత ఉందన్నారు. రాజ్యాంగ పరంగా చట్టబద్ధమైన ఒప్పందానికి రక్షణ ఉంటుందన్నారు. ఆ ఒప్పందాన్ని అమలు చేయాల్సిందేనని వాదనలు వినిపించారు. ఇచ్చిన హామీ నుంచి ప్రభుత్వం వెనక్కి తగ్గడానికి వీల్లేదన్న న్యాయవాది బి. ఆదినారాయణరావు.. మూడు రాజధానుల నిర్ణయం రైతుల హక్కులను హరించడమే అవుతుందన్నారు. వారి హక్కులను పణంగా పెట్టి రాజధాని తరలింపు ఎంత వరకు సమంజసం అని రైతుల తరపు న్యాయవాది ప్రశ్నించారు.

రాజధానిగా అమరావతి సమిష్టి నిర్ణయం

రాజధాని మార్చడం వల్ల ఇప్పటికే ఖర్చు చేసిన రూ. 3వేల కోట్లు వృధా అవుతాయన్నారు. సుపరిపాలనను దృష్టిలో ఉంచుకుని ప్రభుత్వాలు విధానపరమైన నిర్ణయాలు తీసుకుంటుంటాయన్న న్యాయవాది... ప్రభుత్వాలు మారినప్పుడల్లా వాటిని మార్చడం సరికాదన్నారు. గత ప్రభుత్వ హయాంలో చట్టసభల్లో విస్తృతంగా చర్చించి, రాజధానిగా అమరావతి అని సమిష్టిగా నిర్ణయం తీసుకున్నారన్నారు. ఆ నిర్ణయాన్ని గౌరవించాలని తెలిపారు. భూసమీకరణలో అక్రమాలు చోటు చేసుకుంటే వాటిపై చర్యలు తీసుకోవాలి తప్పా .. శరవేగంగా అభివృద్ధి జరుగుతున్న అమరావతి పనుల్ని నిలిపేయడం సరికాదన్నారు. ప్రస్తుత ప్రభుత్వం తన ఉద్దేశాన్ని నెరవేర్చుకోవడం కోసం మూడు రాజధానులకు సంబంధించి పాలన వికేంద్రీకరణ, సీఆర్డీఏ రద్దు చట్టాలను తీసుకొచ్చిందని సీనియర్ న్యాయవాది ఆదినారాయణరావు వాదనలు వినిపించారు.

ఇదీ చదవండి : ఇదో ఫ్రాడ్ ప్రభుత్వం.. ఆయనో ఫేక్ సీఎం: చంద్రబాబు