తెలంగాణ రాష్ట్రవ్యాప్తంగా వర్షాలు విస్తారంగా కురుస్తున్నాయి. ఛత్తీస్‌గఢ్‌పై ఉపరితల ఆవర్తనం వ్యాపించింది. తూర్పు, పశ్చిమ భారత ప్రాంతాల మధ్య గాలులతో ద్రోణి 3.1 కిలోమీటర్ల ఎత్తున ఉంది. తెలంగాణలో రుతుపవనాలు చురుగ్గా కదులుతున్నాయి. వీటి ప్రభావంతో గురువారం రాష్ట్రంలో అక్కడక్కడ భారీ వర్షాలు కురిసే అవకాశాలున్నాయని వాతావరణశాఖ తెలిపింది. మంగళవారం ఉదయం 8 నుంచి బుధవారం రాత్రి 8 గంటల వరకు రాష్ట్రంలో పలుచోట్ల అతి భారీ వర్షాలు కురిశాయి. అత్యధికంగా హాజీపూర్(మంచిర్యాల జిల్లా)లో 21.3 సెంటీమీటర్లు కురిసింది. మొత్తం 18 చోట్ల 10 సెంటీమీటర్లకు పైగా వర్షం కురిసింది. గత పదేళ్లలో జులై నెలలో ఒకరోజు(24 గంటల్లో) కురిసిన అత్యధిక వర్షం 2013, జులై 19న హాజీపూర్‌లో 17.7 సెం.మీ.లుగా వాతావరణ శాఖ రికార్డుల్లో ఉంది. అక్కడ మంగళవారం రాత్రి (12 గంటల వ్యవధిలో) ఇంతకన్నా ఎక్కువ వర్షం కురవడంతో కొత్త రికార్డు 21.3 సెం.మీ.లుగా నమోదైంది. హైదరాబాద్‌లోని హస్తినాపురంలో 8.5 సెం.మీ. వర్షపాతం నమోదైంది. గ్రేటర్‌ కార్పొరేషన్‌ అప్రమత్తత ప్రకటించింది.
అత్యధికంగా వర్షం కురిసిన ప్రాంతాలు
| జిల్లా | ప్రాంతం | కురిసిన వర్షం(సెం.మీ.లలో) |
| మంచిర్యాల | హాజీపూర్ | 21.3 |
| నిర్మల్ | మామడ | 15.3 |
| కామారెడ్డి | జుక్కల్ | 13 |
| నిర్మల్ | లక్ష్మణచాందా | 12.9 |
| జగిత్యాల | వెల్గటూరు | 12.4 |
| జగిత్యాల | రాయికల్‌ | 11.6 |
జిల్లాల్లో విస్తారంగా వర్షాలు..
వివిధ జిల్లాల్లోనూ వర్షం ఏకధాటిగా కురిసింది. మంచిర్యాలలో ఎడతెరిపి లేకుండా కురుస్తున్న వర్షాలకు... సింగరేణి ఉపరితల గనుల్లో వరద నీరు చేరి బొగ్గు ఉత్పత్తి నిలిచిపోయింది. మందమర్రి ఏరియాలోని కళ్యాణిఖని, రామకృష్ణాపూర్‌తో పాటు, శ్రీరాంపూర్ ఏరియా ఇందారం, శ్రీరాంపూర్ ఉపరితల గనుల్లో... 36 వేల టన్నుల బొగ్గు ఉత్పత్తి నిలిచిపోయింది. మంచిర్యాల జిల్లా కోటపల్లి ఎదులబంధం గ్రామంలో వాగు పొంగి... పది గ్రామాలకు రాకపోకలకు అంతరాయం ఏర్పడింది. ఖమ్మం జిల్లాలో వర్షానికి వైరా నదితోపాటు కట్టలేరూలో భారీగా వరదనీరు చేరడంతో చిలుకూరు వద్ద నిర్మిస్తున్న చెక్ డ్యామ్ సమీపంలోని వ్యవసాయ భూములు కోతకు గురయ్యాయి.
ఇదీ చదవండి: చిన్నమొత్తాల పొదుపు ఖాతాలు తెరవండి
