ఉపరితల ఆవర్తనం కారణంగా తెలంగాణ రాష్ట్రంలో పలు చోట్ల విస్తారంగా వర్షాలు కురుస్తున్నాయి. ఫలితంగా వాగులు, వంకలు పొంగి పొర్లుతున్నాయి. రహదారులు జలమయం అయ్యాయి. వాహనదారులు తీవ్ర ఇబ్బందులు ఎదుర్కొన్నారు.
- ఉస్మానియాలో..
వందేళ్ల చరిత్ర కలిగిన హైదరాబాద్‌లోని ఉస్మానియా జనరల్‌ ఆసుపత్రి వార్డులు చెరువులను తలపించాయి. రెండు2 రోజులుగా ఎడతెరపి లేకుండా కురుస్తున్న వర్షాలకు ఆస్పత్రిలోకి వర్షపు నీరు ప్రవేశించింది. వార్డులు జలమయం అయ్యాయి. సరైన మురుగునీటి వ్యవస్థ లేక... డ్రైనేజీ నీరుతో వర్షపు నీరు కలిసి ప్రవహించింది. వైద్య సిబ్బంది కోసం తీసుకువచ్చిన పీపీఈ కిట్లు వరద నీటిలో కొట్టుకుపోయాయి. సూపరింటెండెంట్ కార్యాలయం, సెంట్రల్ స్టెరిలైజేషన్‌ విభాగం, పురుషుల వార్డులోకి నీరు చేరింది. వైద్యులు, రోగులు తీవ్ర అవస్థలు పడ్డారు.
జంట నగరాల్లో ఎంజే మార్కెట్‌, బేగంబజార్‌, కోఠి, సుల్తాన్‌ బజార్‌, నాంపల్లి, బషీర్‌ బాగ్‌, నారాయణ గూడ, హిమాయత్ నగర్, ట్యాంక్ బండ్ వద్ద కురిసిన వర్షానికి వాహనాదారులు తడిసి ముద్దయ్యారు. సికింద్రాబాద్‌ కంటైన్మెంట్‌ ప్రాంతంలోని ఇళ్లలోకి వరద నీరు చేరింది. కాలనీవాసులు నానా అవస్థలు పడ్డారు. చిలకలగూడ, మారేడుపల్లి, కార్ఖానా, తిరుమలగిరి, బోయిన్‌పల్లి, అల్వాల్, ప్యాట్నీ, ప్యారడైజ్, బేగంపేట్‌లో 2 గంటల పాటు వానపడింది. మేడ్చల్‌, వికారాబాద్ జిల్లాల్లో ఏకధాటిగా వర్షం కురిసింది.
- అత్యధికంగా 19.4 సెంటీమీటర్ల వర్షపాతం
తెలంగాణ రాష్ట్ర వ్యాప్తంగా పలుచోట్ల 10 నుంచి 19 సెంటీమీటర్ల వర్షపాతం నమోదైంది. సంగారెడ్డి జిల్లా అన్నానగర్‌లో అత్యధికంగా 19.4 సెంటీమీటర్ల వర్షపాతం నమోదయింది. మంచిర్యాలలోని కొత్తపల్లి 12.9, సిద్దిపేటలోని వెంకట్రావుపేట 12.6, సూర్యాపేటలోని తిరుమలగిరి 12.1, కామారెడ్డిలోని సోమూర్‌ 11.2, హైదరాబాద్‌ కూకట్‌పల్లి 9.4, మూసాపేట్‌లో 8.4 సెంటీ మీటర్ల వర్షం కురిసింది. కామారెడ్డి నిజాంసాగర్ చౌరస్తాలో వరుణుడి ప్రతాపానికి వాహనాలు నీట మునిగాయి. ఉమ్మడి మహబూబ్ నగర్, వరంగల్‌, మెదక్‌, నల్గొండ జిల్లాలో చెరువులు జలకళను సంతరించుకున్నాయి.
- అంత్యక్రియలకు వెళ్లి..
