అమెరికాలో హెర్డ్ ఇమ్యూనిటీ, ఎక్కువమందికి వ్యాక్సినేషన్ వల్ల కరోనా మహమ్మారి తీవ్రత తగ్గుముఖం పట్టిందని… ఇక నుంచి ఏ కొత్త వ్యాక్సిన్ అత్యవసర వినియోగానికి అనుమతులు ఇవ్వరాదని యూఎస్ఎఫ్డీఏ నిర్ణయించినట్లు భారత్ బయోటెక్ సంస్థ తెలిపింది. తాము అభివృద్ధి చేసిన కొవాగ్జిన్ను పూర్తి స్థాయి అనుమతుల కోసం దరఖాస్తు చేసుకోవాల్సిందిగా తమ భాగస్వామి ఆక్యుజెన్కు సూచించిందని వెల్లడించింది. టీకాల అనుమతికి పూర్తిస్థాయి లైసెన్స్ ప్రక్రియ అయిన బయోలాజికల్‌ లైసెన్స్ అప్లికేషన్‌- బీఎల్ఏ మార్గాన్ని అనుసరించాలని సూచించినట్లు పేర్కొంది. అందుకు అదనపు క్లినికల్ ట్రయల్స్ డేటా అవసరమవుతుందని వివరించింది. దానికి మరికొంత సమయం పడుతుందని తెలిపింది.
కొవాగ్జిన్కు ఇప్పటి వరకూ 14 దేశాల్లో అత్యవసర వినియోగానికి అనుమతులు లభించినట్లు తెలిపిన భారత్ బయోటెక్ మరో 50 దేశాల్లో ఆ ప్రక్రియ కొనసాగుతోందని వెల్లడించింది. భారత్లో తయారైన లేదా ఉత్పత్తయిన టీకాకు యూఎస్ఎఫ్డీఏ నుంచి అత్యవసర వినియోగానికి గానీ లేదా పూర్తి స్థాయి లైసెన్స్ కానీ రాలేదని స్పష్టం చేసింది. కొవాగ్జిన్కు యూఎస్ఎఫ్డీఏ అనుమతి వస్తే భారత్లో టీకా ఆవిష్కరణ, తయారీకి అది గొప్ప ముందడుగు అవుతుందని వెల్లడించింది.
