ముఖ్యమంత్రి జగన్ మంగళవారం దిల్లీకి వెళ్లనున్నారు. ప్రధాని మోదీ సహా పలువురు కేంద్ర మంత్రులతో భేటీ అయ్యే అవకాశముంది. మధ్యాహ్నం 3 గంటలకు అమరావతి నుంచి బయల్దేరనున్న జగన్...సాయంత్రం 5గంటలకు దిల్లీకి చేరుకోనున్నారు. వెంటనే రాత్రిలోపు పలువురు కేంద్రమంత్రులతో భేటీ అయ్యే అవకాశాలున్నట్టు ఏపీ భవన్‌ వర్గాలు చెబుతున్నాయి.
కేంద్రమంత్రులు అమిత్ షా, నిర్మలా సీతారామన్‌, హర్షవర్ధన్‌ను కలవనున్న జగన్... రాష్ట్రానికి రావాల్సిన నిధులు, పోలవరం బకాయిలు, కొవిడ్ పోరులో అదనపు నిధుల కోసం విజ్ఞప్తి చేయనున్నట్టు తెలుస్తోంది. వీటితోపాటు రాజకీయాంశాలపై చర్చ జరిగే అవకాశమున్నట్లు సమాచారం. పార్లమెంట్‌లో జరుగుతున్న పరిణామాలతో పాటు... రాష్ట్రంలో ఆలయాలపై జరుగుతున్న దాడుల విషయంలో సీఎం వివరణ ఇచ్చే అవకాశమున్నట్టు తెలుస్తోంది.
