నేడు విశాఖ, విజయనగరం జిల్లాల్లో చంద్రబాబు పర్యటన

తెదేపా అధినేత చంద్రబాబు... ఇవాళ ఉత్తరాంధ్రలో ప్రజాచైతన్య యాత్రను చేపట్టనున్నారు. విశాఖ, విజయనగరం జిల్లాల్లో పర్యటించనున్నారు. చంద్రబాబు పర్యటనను అడ్డుకుంటామన్న వైకాపా ప్రకటనలతో ఉత్కంఠ నెలకొంది. మరోవైపు పార్టీ అధినేత యాత్రను విజయవంతం చేసేందుకు తెదేపా శ్రేణులు విస్తృత ఏర్పాట్లు చేశాయి.

ప్రభుత్వం మూడు రాజధానుల ప్రకటన తర్వాత...తెలుగుదేశం అధినేత చంద్రబాబు తొలిసారిగా ఉత్తరాంధ్రలో పర్యటించనున్నారు. ప్రజా చైతన్య యాత్రలో భాగంగా ఇవాళ విశాఖ, విజయనగరం జిల్లాల్లో పర్యటించనున్నారు. పేదల ఇళ్లస్థలాల కోసం ప్రభుత్వం చేపట్టిన భూసేకరణపై పలు ఆందోళనలు వ్యక్తమవుతున్న వేళ... విశాఖ జిల్లా పెందుర్తిలో బాధితులతో చంద్రబాబు మాట్లాడనున్నారు. విజయనగరం జిల్లా పర్యటనలో శృంగవరపుకోట, గజపతినగరం, విజయనగరం నియోజకవర్గాల్లో బస్సు యాత్ర నిర్వహిస్తారు. ఎస్.కోట, కొత్తవలసలో అన్న క్యాంటీన్‌ల తొలగింపుపై నిరసన కార్యక్రమాల్లో పాల్గొనడం సహా... మూడు చోట్ల బహిరంగ సభల్లో మాట్లాడతారు.

అనుమతిపై ఉత్కంఠ...

చంద్రబాబు పర్యటనకు అనుమతిపై రాత్రి వరకు ఉత్కంఠ కొనసాగింది. ఎట్టకేలకు రాత్రి 10 గంటల సమయంలో యాత్రకు పోలీసులు షరతులతో కూడిన అనుమతి ఇచ్చారు. పార్టీ అధినేతకు స్వాగతం పలికేందుకు కేవలం ఎమ్మెల్యేలు, నియోజకవర్గ బాధ్యులకు మాత్రమే అవకాశం కల్పిస్తామని పోలీసులు చెప్పడంపై తెదేపా నేతలు ఆగ్రహం వ్యక్తం చేశారు. విశాఖ పోలీసు కమిషనర్ ఆర్. కె. మీనాను కలిసి... అసంతృప్తి వ్యక్తం చేశారు. చంద్రబాబు పర్యటన వేళ అశాంతి సృష్టించేందుకు వైకాపా ప్రయత్నాలు చేస్తోందని... వారిని పోలీసులు ఎందుకు అడ్డుకోవడం లేదని తెదేపా నేతలు ప్రశ్నించారు.

అడ్డుకోవాల్సిన అవసరం ఉంది:మంత్రి అవంతి

ఉత్తరాంధ్ర అభివృద్ధికి అడ్డంకిగా మారిన ప్రతిపక్షనేత చంద్రబాబు పర్యటనను అడ్డుకోవాల్సిన అవసరం ఉందని మంత్రి అవంతి శ్రీనివాసరావు అన్నారు. దుష్ప్రచారం చేయడమే చంద్రబాబు పర్యటన ఉద్దేశమని మండిపడ్డారు.

రాజధానుల ప్రకటన తర్వాత చంద్రబాబు తొలిసారి పర్యటనను విజయవంతం చేయడానికి తెదేపా చేస్తున్న ఏర్పాట్లు, అడ్డుకోవాలంటూ వైకాపా చేసిన ప్రకటనలతో ప్రతిపక్ష నేత పర్యటనపై ఉత్కంఠ నెలకొంది.

ఇదీ చదవండి :