Ban on Cell Phones in APCPDCL: విధులు నిర్వహించే సమయాల్లో ఉద్యోగులు సెల్ఫోన్ల వినియోగాన్ని నిషేధిస్తూ సెంట్రల్ పవర్ డిస్ట్రిబ్యూషన్ కార్పొరేషన్ నిర్ణయం తీసుకుంది. ప్రత్యేకించి కార్యాలయాల్లో పనిచేసే సిబ్బందికి మాత్రమే ఈ నిబంధన వర్తిస్తుందని సీపీడీసీఎల్ సీఎండీ పద్మా జనార్దన్ రెడ్డి సర్క్యులర్ జారీ చేశారు. సీపీడీసీఎల్కు చెందిన పరిపాలనా కార్యాలయాల్లో సెల్ ఫోన్లపై నిషేధం వర్తిస్తుందని స్పష్టం చేశారు. కంప్యూటర్ ఆపరేటర్లు, ఓఎస్ఓలు, రికార్డు అసిస్టెంట్లు, టైపిస్టులు, జూనియర్ అసిస్టెంట్లు, సీనియర్ అసిస్టెంట్లు, ఇతర అవుట్ సోర్సింగ్ ఉద్యోగులంతా సెల్ఫోన్లను కార్యాలయం బయటే డిపాజిట్ చేసి రావాలని నిబంధన పెట్టారు. విధులు నిర్వహించే సమయంలో సెల్ ఫోన్ల వినియోగం కారణంగా పనివేళలు వృథా అవుతున్నట్టు గుర్తించామని సీపీడీసీఎల్ స్పష్టం చేసింది. సీపీడీసీఎల్ పరిధిలోని అన్ని జిల్లాల్లోని జోనల్, రీజినల్, స్థానిక కార్యాలయాల్లో ఈ నిబంధన వర్తిస్తుందని పేర్కొన్నారు.
ఉద్యోగులు కేవలం భోజన విరామ సమయంలో మాత్రమే సెల్ఫోన్లు వినియోగించుకునేందుకు అవకాశముంటుుందని కార్యాలయ విధులు నిర్వహించే సమయంలో సెల్ఫోన్లు తీసుకురావొద్దని తెలిపారు. కుటుంబానికి సంబంధించిన సమాచారం తెలుసుకునేందుకు ఉన్నతాధికారుల సెల్ఫోన్ నెంబరును ఇవ్వాల్సిందిగా ఆదేశాలు జారీ అయ్యాయి. ఈ ఆదేశాలు ఉల్లంఘిస్తే కఠిన చర్యలు తీసుకుంటామని సీపీడీసీఎల్ పేర్కొంది. 2022 అక్టోబరు 1న తేదీ నుంచి సెల్ఫోన్లపై నిషేధం ఉత్తర్వులు వర్తిస్తాయని వెల్లడించారు. అయితే క్షేత్రస్థాయిలో పనిచేసే సిబ్బందికి ఈ నిబంధనలు వర్తించవని స్పష్టం చేశారు.
ఇవీ చదవండి:
