రాష్ట్రవ్యాప్తంగా భూ రికార్డుల ప్రక్షాళన కోసం భూముల రీసర్వే ప్రక్రియను చేపట్టనున్నట్టు రెవెన్యూ శాఖ మంత్రి ధర్మాన కృష్ణదాస్ స్పష్టం చేశారు. రాష్ట్రవ్యాప్తంగా భూ వివాదాలు సమసిపోతాయని భావిస్తున్నట్టు తెలిపారు. సచివాలయంలో జిల్లా జాయింట్ కలెక్టర్లతో ఆయన సమావేశం నిర్వహించారు. భూముల రీసర్వే ప్రక్రియను పటిష్టంగా నిర్వహించేందుకు అవసరమైన అంశాలపై చర్చించారు.
డిసెంబరు 21 తేదీన కృష్ణా జిల్లా జగ్గయ్యపేట మండలం తక్కెళ్లపాడులో ముఖ్యమంత్రి భూముల రీసర్వే ప్రక్రియను ప్రారంభించనున్నట్టు మంత్రి ధర్మాన తెలిపారు. అత్యాధునిక సాంకేతిక పరిజ్ఞానాన్ని వినియోగించి ఈ రీసర్వే చేపడుతున్నట్టు వెల్లడించారు. గతంలో భూ భారతి పేరిట రీసర్వే మొదలు పెట్టినా సఫలం కాలేదన్నారు. ప్రస్తుతం సర్వే ఆఫ్ ఇండియా ఆధ్వర్యంలో ఈ కార్యక్రమం చేపట్టనున్నట్టు తెలిపారు. రాష్ట్రవ్యాప్తంగా మొత్తం17,466 గ్రామాల్లో 2 కోట్ల 26 లక్షల ఎకరాల స్థలాన్ని సర్వే చేయనున్నట్టు మంత్రి తెలిపారు. వ్యవసాయ భూములతో పాటు ఇళ్ల ఆస్తులనూ సర్వే చేయనున్నట్టు మంత్రి వెల్లడించారు.
శాశ్వతంగా భూహక్కు ఇవ్వటంతో పాటు వివాదాల పరిష్కారానికి వీలు కలుగుతుందని మంత్రి ధర్మాన అభిప్రాయపడ్డారు. సర్వే చేసిన వెంటనే హద్దులు నిర్ణయించి యజమానికి ల్యాండ్ టైటిల్ అప్పగిస్తామన్నారు. గ్రామాల్లో భూతగాదాలు శాశ్వతంగా లేకుండా చేయాలన్నదే తమ ఉద్దేశమని స్పష్టం చేశారు. రీసర్వే ప్రక్రియ కోసం ఇప్పటికే సిబ్బందికి శిక్షణ ఇస్తున్నట్టు తెలిపారు. డ్రోన్లు, కార్స్ టెక్నాలజీ సాయంతో భూముల రీసర్వే జరుగుతుందని తెలిపారు. ఇందుకోసం 987.46 కోట్ల రూపాయలు వెచ్చించనున్నట్టు వివరించారు. సర్వే అనంతరం వేసే సర్వే రాళ్లపై ఎవరి చిత్రాలూ ఉండబోవని స్పష్టం చేశారు.
మరోవైపు ఏపీలో భూముల రీసర్వే కోసం కేంద్ర ప్రభుత్వం 200 కోట్ల రూపాయల్ని ఇస్తున్నట్టు సీసీఎల్ఏ నీరబ్ కుమార్ ప్రసాద్ తెలిపారు. రాష్ట్రంలో సర్వే చేసేందుకు గానూ చదరపు కిలోమీటరు ప్రాంతానికి సర్వే ఆఫ్ ఇండియాకు 5 వేల రూపాయల చొప్పున చెల్లించనున్నట్టు స్పష్టం చేశారు. కార్స్ సాంకేతిక పరిజ్ఞానం ద్వారా చేసే భూముల రీసర్వేలో కేవలం 5 సెంటిమీటర్ల మేర మాత్రమే వ్యత్యాసం వచ్చే అవకాశముందన్నారు. భూముల రీసర్వేలో వివాదాలు తలెత్తితే మూడంచెల వ్యవస్థను సిద్ధం చేశామన్నారు.
అక్కడికక్కడే వీఆర్వో స్థాయి అధికారులు లేదా డిప్యూటీ తహసీల్దారు నేతృత్వంలో మొబైల్ బృందాలు వివాదాలు పరిష్కరిస్తాయని నీరబ్ కుమార్ వివరించారు. అక్కడ కూడా పరిష్కారం కాకపోతే ల్యాండ్ టైటిలింగ్ చట్టం కింద జాయింట్ కలెక్టర్లు వివాదాల పరిష్కారానికి కృషి చేస్తారని ప్రభుత్వం తెలిపింది. ల్యాండ్ టైటిలింగ్ చట్టం కింద తొలిసారిగా దేశంలో టైటిల్ డాక్యుమెంట్లను యజమానులకు ఇస్తున్నట్టు వెల్లడించింది. ప్రతీ సర్వే నెంబరుకూ విశిష్ట సంఖ్య జారీ అవుతుందని.. ఒక్కో గ్రామం సర్వే కోసం 3 నుంచి 4 నెలల సమయం పట్టొచ్చని అంచనా వేస్తున్నారు.
భూ సర్వేలో భాగంగా అక్షాంశాలు, రేఖాంశాలతో పాటు సముద్ర మట్టానికి ఎంత ఎత్తున ఉన్నాయో కూడా లెక్కింపు జరుగుతుందని ప్రభుత్వం తెలిపింది. డ్రోన్లు, కార్స్ బేస్ స్టేషన్లతో పాటు రోవర్లతోనూ సంతృప్తి చెందకపోతే పాత చైన్ల విధానంతోనూ, సివిల్ ఇంజినీరింగ్ విధానంలోనూ సర్వే చేపట్టనున్నట్టు ప్రభుత్వం వివరించింది.
ఇదీ చదవండీ.. 'భూముల రీసర్వే.. ప్రతి కమతానికీ ప్రత్యేక గుర్తింపు సంఖ్య'
