హోటళ్లోకి దూసుకెళ్లిన కారు.. ఇద్దరు మృతి

తెలంగాణ నిజామాబాద్ జిల్లా భీంగల్ మండలం బడాభీంగల్​లో కారు అదుపు తప్పి హోటల్​లోకి దూసుకెళ్లింది. ఈ ఘటనలో ఇద్దురు మృతి చెందారు. డ్రైవర్ మద్యం సేవించి వాహనం నడపడం వల్లే ప్రమాదం జరిగినట్టు పోలీసులు అనుమానిస్తున్నారు

కారు డ్రైవర్ నిర్లక్ష్యం ఇద్దరి ప్రాణాలను బలి తీసుకుంది. ఈ ఘోరం తెలంగాణ నిజామాబాద్ జిల్లా భీంగల్ మండలం బడాభీంగల్​లో చోటు చేసుకుంది. అదుపు తప్పిన కారు రోడ్డుపై ద్విచక్రవాహనాన్ని ఢీ కొట్టి రోడ్డు పక్కనున్న హోటల్​లోకి దూసుకెళ్లింది. హోటల్​లో కూర్చున్న పుప్పాల చిన్న రాజన్న(70) అక్కడికక్కడే మృతి చెందాడు. ద్విచక్రవాహనంపై వెళ్తున్న వేల్పూర్​కు చెందిన భూమన్న(48) అనే వ్యక్తి ఆసుపత్రిలో చికిత్స పొందుతూ మృతి చెందాడు.

భూమన్న తన ఇద్దరు కుమారులతో కలిసి భీంగల్ మండలం చేంగల్ నుంచి బడా భీంగల్ వైపు వెళ్తుండగా... అదే మార్గంలో వచ్చిన కారు వెనుక నుంచి వేగంగా ఢీ కొట్టింది. డ్రైవర్ మద్యం సేవించి వాహనం నడపడం వల్లే ప్రమాదం జరిగినట్టు పోలీసులు అనుమానిస్తున్నారు. ప్రమాదం నుంచి ఇద్దరు చిన్నారులు తృటిలో తప్పించుకున్నారు. వాహనం దూసుకొచ్చే కొన్ని క్షణాల ముందే పక్కకు వెళ్లడం వల్ల ప్రాణాలతో బయటపడ్డారు. ప్రమాదం జరుగుతున్నప్పుడు చిన్నారులు ప్రత్యక్షంగా చూడటం సీసీటీవీలో రికార్డు అయ్యింది.

ఇదీ చూడండి: నేను చనిపోతున్నా.. వెతకొద్దు నాన్నా...