Bandi Sanjay Letter to CM KCR: భాజపా తెలంగాణ రాష్ట్ర అధ్యక్షుడు బండి సంజయ్.. ఆ రాష్ట్ర ముఖ్యమంత్రి కేసీఆర్కు మరో లేఖాస్త్రం సంధించారు. బాసర ట్రిపుల్‌ ఐటీ విద్యార్థుల సమస్యలను తక్షణం పరిష్కరించాలని డిమాండ్ చేశారు. వారి న్యాయమైన 12 డిమాండ్లను వెంటనే ఆమోదించాలని కోరారు. విద్యార్థుల న్యాయమైన సమస్యలపై సీఎం నిరంకుశంగా వ్యవహరిస్తున్నారని బండి సంజయ్ ఆరోపించారు.
జాతీయపార్టీ ఏర్పాటుపై పొలిటికల్‌ స్ట్రాటజిస్టులతో, తెలంగాణ ద్రోహులతో సమావేశం అవడానికి సీఎంకు సమయం ఉంటుంది.. కానీ గత ఆరు రోజులుగా ఆందోళన చేస్తున్న విద్యార్థుల సమస్యల పరిష్కారానికి మాత్రం కేసీఆర్కు టైం దొరకదని ఎద్దేవా చేశారు. కేటీఆర్‌ విదేశీ పర్యటనకు, కేసీఆర్ వ్యక్తిగత ప్రచారం కోసం కోట్లాది రూపాయల ప్రజాధనాన్ని ఖర్చు చేస్తారు.. విద్యార్థుల సమస్యలను పరిష్కరించడం కోసం నిధులు ఉండవా అని ప్రశ్నించారు.
విద్యార్థుల డిమాండ్లను సిల్లీ డిమాండ్లుగా పేర్కొన్న మంత్రి సబితా బేషరతుగా వారికి క్షమాపణ చెప్పాలని బండి సంజయ్ డిమాండ్ చేశారు. మంత్రులు, అధికారులు విద్యార్థులతో మైండ్‌ గేమ్‌ ఆడటం మానుకోవాలని హితవు పలికారు. గోబెల్స్‌ ప్రచారం చేస్తున్న మంత్రులు ఇంద్రకరణ్‌రెడ్డి, సబితా ఇంద్రారెడ్డి సమస్య పరిష్కారమైందని చెప్పడం ప్రభుత్వ దివాళకోరుతనానికి నిదర్శనమని పేర్కొన్నారు. మంత్రులు, అధికారులు, విద్యార్థులను, వారి తల్లిదండ్రులను వేధింపులకు గురిచేస్తున్నారని తెలిపారు. వారి సమస్యల పరిష్కారానికి తక్షణమే అఖిలపక్ష సమావేశం ఏర్పాటు చేయాలన్నారు. బాసర ట్రిపుల్‌ ఐటీ సమస్యలపై అన్ని విద్యార్థిసంఘాలతో ప్రభుత్వం ఒక సమావేశం ఏర్పాటు చేయాలని బండి సంజయ్ డిమాండ్ చేశారు.
Bandi Sanjay on Bahiranga sabha: భాజపా జాతీయ కార్యవర్గ సమావేశాల కోసం 35 విభాగాలు ఏర్పాటు చేసినట్లు బండిసంజయ్‌ వెల్లడించారు. సమావేశాల ఏర్పాట్లు దాదాపు పూర్తయినట్లు తెలిపారు. జాతీయ పదాధికారులు, 18 రాష్ట్రాల సీఎంలు ఈ సమావేశాల్లో పాల్గొంటారని స్పష్టం చేశారు. దాదాపు 300 మంది ప్రతినిధులు సమావేశాలకు హాజరవుతారని పేర్కొన్నారు. ప్రధాని సహా ముఖ్యనేతలు 2 రోజుల పాటు హైదరాబాద్‌లోనే ఉంటారని బండి సంజయ్ తెలిపారు. రాష్ట్రంలో కుటుంబపాలనకు వ్యతిరేకంగా పోరాడుతామని స్పష్టం చేశారు. జులై 3న 10 లక్షల మందితో భారీ బహిరంగ సభ నిర్వహిస్తున్నట్లు బండి సంజయ్ వెల్లడించారు.
ఈ సమావేశాలు నిర్వహించడం అదృష్టంగా భావిస్తున్నాం. తెరాస ప్రభుత్వం ఎన్ని అడ్డంకులు సృష్టించినా భారీ బహిరంగ నిర్వహిస్తాం. రాష్ట్ర ప్రజలకు విశ్వాసం కలిగించేలా జాతీయ కార్యవర్గ సమావేశాలు నిర్వహిస్తున్నాం. పది లక్షల మందితో సభను నిర్వహించేందుకు సిద్ధంగా ఉన్నాం. మమ్మల్ని ఏవిధంగా ఇబ్బందులు పెట్టినా కూడా ముందుకే సాగుతాం. - బండి సంజయ్, భాజపా తెలంగాణ రాష్ట్ర అధ్యక్షుడు
ఇదీ చదవండి: 'ప్రభుత్వ పాఠశాలలో చేరండి.. రూ.5వేలు పొందండి'
