రెవెన్యూ వసూళ్లలో అంచనాలు తప్పుతున్నాయి. అదే సమయంలో రెవెన్యూ ఖర్చులు పెరిగి లోటు తప్పట్లేదు. 2019-20లో రెవెన్యూ లోటును రూ.1778.52 కోట్లకే పరిమితం చేస్తామని బడ్జెట్ అంచనాల్లో చెప్పారు. కానీ సవరించిన అంచనాల ప్రకారం ఏకంగా.. రూ.26,646 కోట్లకు చేరింది. ప్రస్తుత ఆర్థిక సంవత్సరంలో రూ.18,434.14 కోట్లు రెవెన్యూ లోటు ఉంటుందని అంచనా వేస్తున్నారు. రెవెన్యూ వసూళ్లు తగ్గిపోవటం, వ్యయాలను పరిమితం చేయలేని పరిస్థితుల్లో ఈ సవాలు ఎదురవుతోంది. 2019-20లో రెవెన్యూ వసూళ్లు అంచనాల కన్నా బాగా తగ్గిపోయాయి. రూ.1.78 లక్షల కోట్లు ఉంటాయనుకుంటే.. రూ.1.10 లక్షల కోట్లకే పరిమితమయ్యాయి.
సొంతపన్నుల్లో ఆదాయం, పన్నేతర ఆదాయం, కేంద్రపన్నుల్లో వాటాలు, కేంద్రం నుంచి అందే గ్రాంట్‌ ఇన్‌ ఎయిడ్‌ కలిపి రాష్ట్ర రెవెన్యూ ఆదాయంగా లెక్కిస్తారు. దీనికన్నా రెవెన్యూ ఖర్చు ఎక్కువగా ఉంటే లోటుగా పరిగణిస్తారు. 2014-15 నుంచి కూడా రెవెన్యూ లోటు కొనసాగుతోంది. 2018-19లోనే రూ.5235.23 కోట్ల మిగులుతో బడ్జెట్ ప్రతిపాదించారు. కానీ బడ్జెట్ సంవత్సరం ముగిసేనాటికి మిగులు కనిపిచడం లేదు. అది కూడా లోటు సంవత్సరంగానే మారింది. ఏయే రంగాల్లో ఆదాయం వస్తుందో, వేటిలో రాదోనన్న విషయంలో అనుభవాల ప్రతిపదికన అంచనాలు సవరించడం లేదు. అయిదారేళ్ల ఆర్థిక స్వరూపాన్ని పరిశీలించిన తర్వాత కూడా ఆదాయం రాని మార్గాల్లోనూ అధిక అంచనాలు కనిపిస్తున్నాయి.
ఇదీ చూడండి..
రూ.2.24లక్షల కోట్లతో బడ్జెట్ ప్రవేశపెట్టిన ఆర్థిక మంత్రి బుగ్గన
