AP government asked Rs 23,000 crore Loan: ప్రస్తుత ఆర్థిక సంవత్సరం చివరి 3 నెలల్లో 23 వేల కోట్ల రుణం అవసరమవుతుందని రాష్ట్ర ప్రభుత్వం.. రిజర్వు బ్యాంకుకు తెలియజేసింది. రిజర్వ్ బ్యాంక్ వర్గాలు దేశంలోని అన్ని రాష్ట్రాలు, కేంద్ర పాలిత ప్రాంతాలను సంప్రదించి జనవరి నుంచి మార్చి నెలాఖరు వరకు ఎంత మొత్తం రుణం అవసరమవుతుందో సమాచారం సేకరించాయి. ఆ సమాచారం మేరకు రుణ డిమాండ్ క్యాలెండర్‌ను రూపొందించాయి. దాని ప్రకారం జనవరిలో రూ. 5 వేల కోట్లు, ఫిబ్రవరిలో రూ. 11 వేల కోట్లు, మార్చిలో రూ. 7 వేల కోట్ల చొప్పున మొత్తం రూ. 23 వేల కోట్ల అవసరమని ఏపీ రాష్ట్ర ప్రభుత్వం పేర్కొన్నట్లు సమాచారం. ఐతే ఆ తర్వాత ఇవి మారుతూ ఉంటాయి. ప్రతి శుక్రవారం రాష్ట్ర ప్రభుత్వాలు తుది వివరాలు ఇస్తుంటాయి.
కేంద్రం నిర్ణయించాల్సిందే..
రిజర్వ్ బ్యాంకు ప్రతి మంగళవారం నిర్వహించే సెక్యూరిటీల వేలంలో పాల్గొని రాష్ట్రాలు రుణాలు తీసుకుంటాయి. వీటిని పొందేందుకు కేంద్రం నుంచి అనుమతి ఉండాలి. అప్పుడే బహిరంగ మార్కెట్‌లో రుణం తీసుకునే వెసులుబాటు ఉంటుంది. తొలి 9 నెలల కాలంలో అంటే.. ఏప్రిల్‌ నుంచి డిసెంబర్ నెలాఖరు వరకు ఉన్న రుణ పరిమితి మేరకు ఆంధ్రప్రదేశ్‌ ఇప్పటికే అప్పులు తీసుకుంది. చివరి మూడు నెలలకు రాష్ట్రం ఎంత మేర అప్పు తీసుకోవచ్చనేది.. కేంద్రం నిర్ణయించాల్సి ఉంది. ఇంకా దీనికి సంబంధించి అనుమతులు రావాల్సి ఉంది.
ఇప్పటివరకు రూ. 36 వేల 28 కోట్లు రుణం
ఒకవైపు కేంద్రం చెప్పిన లెక్కలు, ఇతర సమాచారం ఆధారంగా విశ్లేషిస్తే ఏపీ ప్రభుత్వానికి ఈ ఆర్థిక సంవత్సరం చివరి మూడు నెలల్లో కేవలం 8 వేల 368 కోట్ల రూపాయల రుణం తీసుకునేందుకే వెసులుబాటు ఉందని విశ్రాంత ఆర్థిక శాఖ అధికారులు చెబుతున్నారు. అలాంటిది రాష్ట్రం ఏకంగా 23 వేల కోట్ల రూపాయలు అవసరమని పేర్కొనడంపై విస్మయం వ్యక్తం చేస్తున్నారు. 2021-22 ఆర్థిక సంవత్సరంలో మొత్తం మ్మీద రూ. 44 వేల 396.18 కోట్లను బహిరంగ మార్కెట్ నుంచి రుణంగా తీసుకునే అవకాశం వచ్చింది. అందులో ఇప్పటివరకు రాష్ట్రప్రభుత్వం 36 వేల 28 కోట్లు రుణం తీసుకోగా ఇక రుణ అర్హత పరిమితి రూ. 8 వేల 368 కోట్లు మాత్రమే ఉంది.
ఇదీ చదవండి:
CM Jagan At YSR Pension: ఎన్నికల మేనిఫెస్టోలో ఇచ్చిన ప్రతి హామీని నెరవేరుస్తున్నాం: సీఎం జగన్
