తెలంగాణ సరిహద్దుల్లో చంద్రబాబు కారవాన్!

తెదేపా జాతీయ అధ్యక్షుడు చంద్రబాబు కారవాన్​ను రాష్ట్ర పోలీసులు తెలంగాణ సరిహద్దుల్లో వదిలేశారు. అనంతరం తెదేపా పార్టీ రాష్ట్ర అధికార ప్రతినిధి నెల్లూరి దుర్గాప్రసాద్ వాహనాన్ని గుర్తించి హైదారాబాద్​కు తరలించారు.

చలో ఆత్మకూరు నిమిత్తం తెదేపా జాతీయ అధ్యక్షుడు చంద్రబాబుకు తెదేపా శ్రేణులు ప్రత్యేక వాహనం కారవాన్​ను ఏర్పాటు చేశారు. హైదరాబాద్​ నుంచి రాష్ట్రానికి రప్పించే క్రమంలో పోలీసులు ఆ వాహనాన్ని చలో ఆత్మకూరు నిర్వహించిన రోజున ఉదయం స్వాధీనం చేసుకున్నారు. కొందరు పోలీసులు వాహనాన్ని అద్దంకి- నార్కెట్​పల్లి ప్రధాన రహదారిలో వాడపల్లి వద్ద సరిహద్దు దాటించారు. మిర్యాలగూడ- నల్గొండ రహదారి మధ్యలో వాహనాన్ని ఆపి వెళ్లారు. వాహనం లోపలికి వెళ్లే తాళాలను వెంట తీసుకెళ్లగా, వాహనాన్ని నడిపే తాళాలను మాత్రమే డ్రైవర్​కు ఇచ్చారు. అయోమయానికి గురైన డ్రైవర్ ఎన్టీఆర్ ట్రస్టుభవన్​కు ఫోన్​లో సమాచారమిచ్చారు. అక్కడి వారు తెదేపా రాష్ట్ర అధికార ప్రతినిధి నెల్లూరి దుర్గాప్రసాద్​కు విషయాన్ని తెలిపారు. వాహనాన్ని ఆయన మిర్యాలగూడలోని తన సొంత ఇంటివద్దకు తీసుకొచ్చారు. బుధవారం రాత్రి హైదరాబాద్​కు పంపారు.

ఇదీ చూడండి:

చలో ఆత్మకూరుకు విఫలయత్నం... చంద్రబాబు దిగ్బంధం