రాజధానిలోని అంకుర ప్రాంత అభివృద్ధి ప్రాజెక్టు కోసం ఏర్పాటు చేసిన ప్రత్యేక సంస్థ అమరావతి డెవలప్మెంట్ పార్ట్నర్స్ లిక్విడెషన్ ప్రక్రియకు ప్రభుత్వం అనుమతి మంజూరు చేసింది. ఇటీవల కేబినెట్ సమావేశంలో ఈ అంశానికి ఆమోదం తెలిపిన ప్రభుత్వం తాజాగా ఉత్తర్వులు జారీ చేసింది. అంకుర ప్రాంతంలో తదుపరి పనులు జరగకుండా ముందస్తుగా చేసుకున్న ఒప్పందాలను రద్దు చేసుకోవాల్సిందిగా ప్రభుత్వం అప్పటి సీఆర్డీఏ ప్రస్తుత ఏఎంఆర్డీఏ కమిషనర్, అమరావతి డెవలప్మెంట్ కార్పొరేషన్కు సూచించింది.
స్టార్టప్ ఏరియా డెవలప్మెంట్ ప్రాజెక్టు కోసం చేసుకున్న రాయితీ, అభివృద్ధి ఒప్పందం, భాగస్వామ్య ఒప్పందాలను రద్దు చేసుకునేందుకు ప్రస్తుత అమరావతి మెట్రో డెవలప్మెంట్ అథారిటీ, అప్పటి సీఆర్డీఏ కమిషనర్కు, ఏడీసీ సీఎండీకి అధికారాలు అప్పగిస్తూ ఉత్తర్వులు ఇచ్చారు.
అమరావతి డెవలప్మెంట్ కార్పొరేషన్-సింగపూర్ కన్సార్షియమ్తో కలిసి ఏర్పాటు చేసిన అమరావతి డెవలప్మెంట్ పార్ట్నర్స్ లిమిటెడ్ పరస్పర అంగీకారంతో లిక్విడెషన్ ప్రక్రియ చేపట్టాలని అందులో సూచించారు. 6.84 చదరపు కిలోమీటర్ల పరిధిలోని అంకుర ప్రాంత అభివృద్ధి ప్రాజెక్టులోని ఒప్పందాలపై ముందుకు వెళ్లకుండా లిక్విడెషన్ మూసివేత ప్రక్రియ చేపట్టాలని ఉత్తర్వుల్లో పేర్కొన్నారు. అమరావతి డెవలప్మెంట్ పార్ట్నర్స్ సంస్థలో ఏడీసీకి 7.90 కోట్ల రూపాయల నిధులు ఉన్నట్టు ప్రభుత్వం స్పష్టం చేసింది.
ఇదీ చదవండి : మూడోరోజు శాసనసభ నుంచి తెదేపా సభ్యుల సస్పెన్షన్
