తెలంగాణలో దారుణం: కోతికి ఉరి వేసి చంపిన మానవ మృగం

మనుషుల్లో మానవత్వం మంటగలిచిపోతుందనడానికి ఈ ఘటన నిదర్శనం. దాహార్తిని తీర్చుకునేందుకు వచ్చిన ఓ మూగ జీవి పట్ల కర్కశంగా వ్యవహరించి ఉరివేసి చంపేశాడు ఓ వ్యక్తి. తెలంగాణలోని ఖమ్మం జిల్లా అమ్మపాలెంలో జరిగిన ఈ ఘటన ఆలస్యంగా వెలుగు చూసింది. ఈ దారుణ సంఘటనను సెల్​ఫోన్​లో చిత్రీకరించటం వల్ల విషయం బయటకు వచ్చింది.

నీటి తొట్టిలో పడి కొట్టుమిట్టాడుతున్న ఓ కోతిని మాన‌వ‌తా దృక్పథంతో కాపాడాల్సింది పోయి… ఆ కోతిని ఉరి తీసి చంపేశాడో కర్కశుడు. తెలంగాణలోని ఖమ్మం జిల్లా వేంసూరు మండలం అమ్మ‌పాలెంలో సాదు వెంకటేశ్వరరావు అనే వ్యక్తి ఇంటి ఆవరణలో నీటి తొట్టి ఉంది. దాహార్తిని తీర్చుకునేందుకు వచ్చి ప్రమాదవశాత్తు ఆ ఖాళీ నీటి తోట్టిలో ఓ కోతి పడింది.

మూగ జీవిని కాపాడాల్సింది పోయి మిగతా కోతులు చూస్తుండగా దాన్ని ఉరివేసి తనలోని పైశాచికత్వాన్ని ప్రదర్శించాడు. ఆ కోతి చనిపోవటంతో దాన్ని కుక్కలకు ఆహారంగా పడేశాడు. మిగతా కోతులు కుక్కలు, మనుషులను దగ్గరికి రానీయకుండా మృతిచెందిన కోతిని తీసుకెళ్లి తమలోని ఐకమత్యాన్ని చాటుకున్నాయి. మూగజీవాల పట్ల ఇంత దారుణానికి ఒడిగట్టిన వ్యక్తిపై చర్యలు తీసుకోవాలని పలువురు డిమాండ్ చేస్తున్నారు.