SBI E Rupee Wallet News : ప్రముఖ ప్రభుత్వ రంగ బ్యాంక్ స్టేట్ బ్యాంక్ ఆఫ్ ఇండియా (ఎస్బీఐ) తమ వినియోగదారులకు శుభవార్త వినిపించింది. డిజిటల్ రూపాయికి సంబంధించి నూతన సదుపాయాన్ని ప్రారంభించింది. అన్ని రకాల మర్చెంట్ క్యూఆర్‌ కోడ్‌లను స్కాన్‌ చేసి డిజిటల్ రూపీని (CBDC) పేమెంట్స్కు వినియోగించేకునేందుకు వీలుగా యూపీఐ ఇంటర్‌-ఆపరేబిలిటీ సదుపాయాన్ని తమ కస్టమర్స్కు కల్పిస్తున్నట్లు ప్రకటించింది. అంటే ఎస్బీఐ ఇ-రూపీ (e-Rupee) యాప్ వాడుతున్న వారు ఇకపై యూపీఐని స్కాన్‌ చేసి ఆర్థిక లావాదేవీలను పూర్తి చేసుకోవచ్చని ఎస్బీఐ సోమవారం వెల్లడించింది. తమ వినియోగదారులకు డిజిటల్ సౌలభ్యాన్ని మరింత చేరువచేసేందుకే ఈ నిర్ణయం తీసుకున్నట్లు స్పష్టం చేసింది. కాగా, తాజాగా తీసుకువచ్చిన ఈ ఫీచర్ను ఎస్బీఐ ఇ-రూపీ యాప్ ద్వారా వినియోగించుకోవచ్చు. ( SBI Latest News On Digital Rupee )
డిజిటల్ రూపీ వినియోగం!
SBI E Rupee : ఇంతకుముందు పలు ప్రైవేటు రంగ బ్యాంకులు కూడా ఈ సౌలభ్యాన్ని తీసుకువచ్చాయి. ముందుగా హెచ్‌డీఎఫ్‌సీ ఈ సదుపాయాన్ని ప్రవేశపెట్టింది. ఆ తర్వాత యాక్సిస్‌ బ్యాంక్, యెస్‌ బ్యాంక్, కెనరా బ్యాంక్ సైతం ఇంటర్‌-ఆపరేబిలిటీ ఫీచర్ను అందుబాటులోకి తెచ్చాయి. కాగా, తాజా ప్రకటనతో ఎస్బీఐ కూడా ఆ జాబితాలోకి చేరినట్లయింది. దీని ద్వారా యూపీఐ లావాదేవీల కోసం క్యూఆర్‌ కోడ్‌లను వినియోగిస్తున్న వ్యాపారులు.. తమ రోజువారీ వ్యాపార లావాదేవీల్లో ఇకపై డిజిటల్ రూపాయిని సైతం వినియోగించుకోవడానికి అవకాశం ఉంటుంది.
పైలట్ ప్రాజెక్ట్!
SBI CBDC Wallet : సెంట్రల్‌ బ్యాంక్ డిజిటల్ కరెన్సీ( CBDC )గా పేర్కొనే ఇ-రూపీ(డిజిటల్ రూపీ) పైలట్ ప్రాజెక్ట్‌ను ఆర్‌బీఐ 2022 డిసెంబర్ 1న ప్రారంభించింది. తొలుత హోల్‌సేల్‌ విభాగంలో ఈ పైలట్ ప్రాజెక్ట్‌ను చేపట్టారు. తర్వాత రెగ్యులర్‌ లావాదేవీలైన రిటైల్‌ యూజర్ల కోసం ఈ ప్రాజెక్ట్‌ను ప్రారంభించారు. ఎస్బీఐ, ఐసీఐసీఐ బ్యాంక్, ఎస్ బ్యాంక్, ఐడీఎఫ్‌సీ బ్యాంక్, బ్యాంక్ ఆఫ్ బరోడా, యూనియన్‌ బ్యాంక్, హెచ్‌డీఎఫ్‌సీ బ్యాంక్, కోటక్‌ మహీంద్రా బ్యాంక్ ఈ పైలట్ ప్రాజెక్ట్‌లో పాల్గొంటున్నాయి. ఇందులో భాగంగా ఎంపిక చేసిన కస్టమర్లను బ్యాంకులు ఆహ్వానిస్తున్నాయి. వారు మొబైల్‌ అప్లికేషన్‌ను డౌన్లోడ్ చేసుకొని ఇ-రూపీని వినియోగించుకోవచ్చు.
సీబీడీసీ అంటే ఏంటి?
2022-23 కేంద్ర బడ్జెట్ సమయంలో ఆర్థిక మంత్రి నిర్మలా సీతారామన్ ఈ CBDC సిస్టంను ప్రవేశపెడుతున్నట్లు ప్రకటించారు. సింపుల్గా చెప్పాలంటే ఈ సీబీడీసీలు అనేవి ఒకరకమైన డిజిటల్ కరెన్సీ. వీటిపై నగదు డిపాజిట్లపై వచ్చే వడ్డీలేమి రానప్పటికీ.. వీటిని సులువుగా ఇతర కరెన్సీలోకి మార్చుకోవచ్చు.
