లాక్డౌన్ కారణంగా చాలామంది ప్రభుత్వ, ప్రైవేటు ఉద్యోగులు ఇంటి నుంచి విధులు నిర్వహిస్తూ.. వీడియో సమావేశాలకు 'జూమ్' యాప్ను వినియోగిస్తున్నారు. అయితే ఈ ప్లాట్పాం శ్రేయస్కరం కాదని వచ్చిన ఆరోపణలపై ఆ సంస్థ స్పందించింది. డేటా హ్యాకింగ్, వేధింపులు వంటి సమస్యల పరిష్కారానికి తగిన చర్యలు తీసుకోనున్నట్లు జూమ్ చీఫ్ ఎగ్జిక్యూటివ్ ఎరిక్ యువాన్ తెలిపారు.
పటిష్ఠ భద్రత..
భద్రతా పరమైన సమస్యలను కనిపెట్టినవారికి బహుమతులిచ్చే 'బగ్ బౌంటీ' కార్యక్రమం ద్వారా.. లూటా సెక్యూరిటీ సంస్థతో కలిసి పనిచేయనున్నట్లు స్పష్టం చేశారు యువాన్. అపరిచితుల నుంచి వచ్చే సంభాషణలు, వీడియో సమావేశాలను లాక్ చేసేలా ప్రత్యేకమైన సెట్టింగులను తీసుకురానున్నట్లు పేర్కొన్నారు.
చైనా నుంచి డేటా హ్యాకింగ్ జరుగుతోందని అనుమానాలు తలెత్తుతున్న క్రమంలో.. ఈ వారంతం నుంచి చెల్లింపు ఖాతాదారులు వారి సమాచారాన్ని ఏ ప్రాంతాలకు మళ్లించాలో తామే ఎంపిక చేసుకునే సదుపాయాన్ని తీసుకురానున్నట్లు పేర్కొన్నారు.
ఈ విధంగా హ్యాకింగ్...
యాప్ వినియోగదారుల లాగిన్ సమాచారాన్ని నేరస్థులు దొంగలించి 'డార్క్వెబ్'కు విక్రయిస్తున్నట్లు సంస్థ నివేదికలో వెల్లడించింది. ఇటర్నెట్ ద్వారా, ప్రమాదకరమైన వైరస్ను కంప్యూటర్లలోకి ఎక్కించి ఈ నేరానికి పాల్పడే అవకాశం ఉందని జూమ్ సలహాదారు అలెక్స్ స్టామెస్ పేర్కొన్నారు. ఇటువంటి భద్రతా పరమైన అన్ని సమస్యలనూ పరిశీలిస్తున్నట్లు పేర్కొన్నారు.
మార్చిలో అమాంతం పెరిగిన యూజర్లు...
ఇటీవల జూమ్ యాప్ను ప్రభుత్వ అధికారులెవ్వరూ ఉపయోగించకూడదని కేంద్రం ఆదేశించింది. న్యూయార్క్లోనూ ట్రంప్ సర్కార్ ఈ తరహాలోనే సూచనలు జారీ చేసింది. జూమ్ యాప్ను హ్యాకర్లు హైజాక్ చేస్తున్నట్లు ఎఫ్బీఐ కూడా హెచ్చరించింది. గతేడాది ఈ యాప్ను 10 మిలియన్ల మంది ఉపయోగిస్తుండగా.. ఈ ఏడాది మార్చి నుంచి ఏకంగా 200 మిలియన్ల మంది వినియోగిస్తున్నారు.
