అభివృద్ధిని దెబ్బతీసేలా, సంక్షేమాన్ని కుంటుపరిచేలా వైకాపా ప్రభుత్వం పని చేస్తోందని యనమల ఆక్షేపించారు. ప్రతిపక్ష కార్యకర్తలపై దాడులు చేయడమే వైకాపా ప్రభుత్వ ప్రధాన ధ్యేయమన్న యనమల...నెల రోజుల్లోనే వైకాపా ప్రభుత్వ అస్తవ్యస్త పాలనను ప్రజలు చూశారన్నారు. ఈ ఖరీఫ్లో తీవ్ర వర్షాభావం, కరవు పరిస్థితులు ఎదురైతే...ఆ పరిస్థితుల నుంచి బయటపడేలా కసరత్తే లేదని విమర్శించారు.
ఎన్నాళ్లీ విత్తన కష్టాలు
ఖరీఫ్ సాగుకు విత్తనాలు అందక రైతన్నలు ఆందోళనలు చేసే పరిస్థితులు వచ్చాయన్న యనమల..కనీసం విత్తన పంపిణీపై యాక్షన్ ప్లాన్ రూపొందించలేదని వ్యాఖ్యానించారు. ఎదుటివాళ్ల ఇళ్లు కూల్చేందుకే ప్రభుత్వం ఆలోచిస్తోంది తప్ప... ప్రజల గురించి ఆలోచించడం లేదన్నారు. విత్తనాలకు 380 కోట్ల రూపాయలు ఇవ్వలేనివారు.. వేల కోట్ల హామీలు ఎలా నెరవేరుస్తారని ప్రశ్నించారు. 17 వేల కోట్ల రూపాయలు రైతుల ఖాతాల్లో జమ చేసిన తెదేపా ప్రభుత్వంపై నిందలేయడం మాని విత్తన కొరత తీర్చాలని హితవు పలికారు.
అభివృద్ధి ఆగింది
నెలరోజుల్లో అభివృద్ధి ఇంచు కూడా కదలేదన్న యనమల...పోలవరం పనులు నిలిచిపోయాయని, మళ్లీ ఎప్పుడు మొదలవుతాయో చెప్పలేని పరిస్థితి ఉందని విమర్శించారు. పట్టిసీమకు నీళ్లు ఆపేశారన్నారు. ఈ ఏడాది వ్యవసాయ ఉత్పాదకత ఎంత ఉంటుందో ఊహించే పరిస్థితులు లేవన్న ఆయన...అవి జీఎస్డీపీపై తీవ్ర ప్రభావం చూపనున్నాయన్నారు. ఈ కారణాలతో వృద్ధిరేటు సింగిల్ డిజిట్కు పడిపోయే ప్రమాదం ఉందని అభిప్రాయపడ్డారు. ఇవన్నీ పట్టించుకోకుండా వైకాపా రాజకీయ కక్ష సాధింపు చర్యలు పూనుకుంటుదన్నారు. కమిటీల పేరుతో రాజధాని నగర నిర్మాణ పనులు ఆపేశారని మండిపడ్డారు.
ఇదీ చదవండి : స్పైస్జెట్ విమానానికి తప్పిన పెను ప్రమాదం!
