గుంటూరు జిల్లా అమర్తలూరు మండలం ప్యాపర్రులో దారుణం చోటుచేసుకుంది. అనుమానంతో కళ్లు మూసుకుపోయిన ఓ వ్యక్తి తన భార్య గొంతు కోశాడు. అడ్డొచ్చిన అత్తపైనా కత్తితో దాడి చేశాడు. ఈ ఘటనలో భార్య ప్రియాంకకు తీవ్రగాయాలు కాగా... అత్త మొద్దుపాపకు గొంతుపై గాయమైంది. వీరిద్దరిని తొలుత తెనాలి ప్రభుత్వాసుపత్రికి... తర్వాత గుంటూరు సర్వజనాసుపత్రికి తరలించారు. ఆత్తారింట్లో శుక్రవారం శుభకార్యం జరగాల్సి ఉండగా... అల్లుడు ఈ దారుణానికి ఒడిగట్టాడు. దీంతో పెళ్లింట్లో ఒక్కసారిగా విషాదం నెలకొంది.
అనుమానమే ఇంత పని చేసింది
రెండేళ్లుగా మదన్ తన భార్యపై అనుమానం పెంచుకొని ఆమెను శారీరకంగా వేధిస్తున్నాడు. తెనాలి ప్రైవేట్‌ వైద్యశాలలో నర్సుగా పనిచేస్తున్న ప్రియాంక కుటుంబ కలహాల నేపథ్యంలో మూడునెలల క్రితం తన పుట్టింటికి వచ్చేసింది. అక్కడి నుంచే ప్రియాంక తన విధులకు హాజరయ్యేది. ఈ క్రమంలో బుధవారం విధులు ముగిసిన అనంతరం ప్రియాంకను మదన్ బలవంతంగా తన ఇంటికి తీసుకెళ్లాడు. గురువారం ఉదయం ద్విచక్ర వాహనంపై మళ్లీ ప్యాపర్రు గ్రామానికి తీసుకొచ్చి వదిలి పెట్టి బయటకు వెళ్లాడు. అనంతరం మధ్యాహ్నం సుమారు 12గంటల సమయంలో పనుల నిమిత్తం బయటకు వెళ్లిన ప్రియాంకతో గొడవకు దిగిన మదన్.. తన వద్ద ఉన్న చాకుతో ఆమె గొంతు కోశాడు. విషయం తెలుసుకున్న ప్రియాంక తల్లి పాప అక్కడికి వెళ్లి అల్లుడిని అడ్డుకోబోయింది. దీంతో అడ్డుకోబోయిన అత్తపై కూడా దాడి చేసి గొంతు కోశాడు. తీవ్రంగా గాయపడిన వీరిని బంధువులు వెంటనే గుంటూరు ప్రభుత్వ ఆస్పత్రికి తరలించారు. ప్రియాంక ఫిర్యాదు మేరకు పోలీసులు కేసు నమోదు చేశారు. పరారీలో ఉన్న మదన్ కోసం పోలీసులు గాలిస్తున్నారు.
ఇదీ చదవండీ :
