భారత అత్యునత సంస్థల పట్ల కాంగ్రెస్ దుష్ప్రచారం చేస్తోందని భాజపా నేత అరుణ్ జైట్లీ ఆరోపించారు. హస్తం నుంచి దేశంతో పాటు మన సంస్థలను కాపాడుకోవాల్సిన సమయం వచ్చిందని ఆయన అన్నారు.
గతంలో కాంగ్రెస్ ప్రభుత్వం ఆర్బీఐ, న్యాయశాఖ సహా కేంద్ర దర్యాప్తు సంస్థ కార్యకలపాల్లో కలుగజేసుకుని ఏవిధంగా అటంకం కలిగించారో దేశ ప్రజానీకానికి తెలుసునని పేర్కొంటూ ఫేస్బుక్లో ఓ పోస్ట్ చేశారు జైట్లీ.
శస్త్రచికిత్స అనంతరం శనివారం రాత్రి అమెరికా నుండి తిరిగొచ్చారు జైట్లీ. "గడిచిన రెండు నెలల కాలంలో కాంగ్రెస్ అసత్య ప్రచారాలు చేసింది. అయితే అబద్ధాలకు దీర్ఘావుయు లేదు. వీటిని దేశ ప్రజానీకం నమ్మలేదు." అని సంస్థలపై దాడులు- తాజా కల్పనలు అన్న పేరుతో ఉన్న ఫేస్బుక్ పేజ్లో పోస్ట్ చేశారు.
పశ్చిమ బంగలో ప్రజాసామ్యం ప్రమాదంలో ఉందని జైట్లీ దుయ్యబట్టారు. రాష్ట్రంలో భాజపా కార్యకర్తలు స్వేచ్ఛగా తిరగలేని పరిస్థితులు నెలకొన్నాయని ఆవేదన వ్యక్తం చేశారు.
భాజపా సమావేశాలకు, రథయాత్రలకు అటంకాలు సృష్టిస్తున్నారని ఆయన విమర్శించారు. మరోవైపు కాంగ్రెస్ దుశ్చర్యలకు అంతులేకుండా పోయిందని కేరళలో కెమెరాల ముందే గోవులను వధిస్తూ, మధ్యప్రదేశ్లో మాత్రం గో హంతకులను అరెస్టు చేయాలని ధర్నాలు చేస్తున్నారని జైట్లీ ఆరోపించారు.
ప్రభుత్వాన్ని స్వేచ్ఛగా విమర్శిస్తూనే భావప్రకటనా స్వేచ్ఛ ప్రమాదంలో పడిందని కాంగ్రెస్ మొసలి కన్నీరు కారుస్తోందని జైట్లీ ఎద్దేవా చేశారు.
ఇటీవల జరిగిన ఛత్తీస్గఢ్ ఎన్నికల్లో కాంగ్రెస్ అధ్యక్షుడు రాహుల్,మావోయిస్టులతో పొత్తు కుదుర్చుకున్నారని, జవహర్లాల్ నెహ్రూ విశ్వవిద్యాలయంలో తుకెడె-తుకెడె గ్యాంగ్తో భుజాలు,భుజాలు రాసుకున్నారని జైట్లీ తీవ్ర విమర్శలు చేశారు.
పార్లమెంట్ సమావేశాలకు రాహుల్ అటంకం కలిగిస్తున్నారని, రఫేల్పై ఆయన చేసిన రెండు ప్రసంగాల్లో ప్రధానమంత్రి పై ద్వేషం,అసూయ స్పష్టంగా కనిపించిందని జైట్లీ అన్నారు.
దేశ వాయుసేనను బలోపేతం చేయడానికే రఫేల్ యద్ధ విమానాలు కొనుగోలు చేస్తున్నామని, దీనినీ హస్తం పార్టీ రాజకీయం చేస్తోందని ఆయన విమర్శించారు.
2008-2014 మధ్య కాలంలో దేశ బ్యాంకింగ్ వ్యవస్థను నాశనం చేసిందని జైట్లీ అన్నారు. ఎలక్ట్రానిక్ ఓటింగ్ యంత్రాల్లో ఎటువంటి లోపాలు లేవని ఉద్దేశపూర్వకంగానే ఎన్నికల సంఘంపై కాంగ్రెస్ ఆరోపణలు చేస్తోందని జైట్లీ విమర్శించారు.
ఆర్బీఐ, సీబీఐ సహా వివిధ సంస్థల కార్యకలపాల్లో ప్రభుత్వం జోక్యం చేసుకోవట్లేదని జైట్లీ స్పష్టం చేశారు.
