ముఖ్యమంత్రికి తమ సమస్యలు చెప్పుకుని వాటి పరిష్కారంపై హామీ తీసుకునేందుకు రాష్ట్రంలోని పలు ప్రాంతాల నుంచి గుంటూరు జిల్లా తాడేపల్లి.. సీఎం జగన్ నివాసానికి ప్రజలు పెద్ద ఎత్తున వస్తున్నారు. ఉదయాన్నే వినతులు స్వీకరిస్తున్నారని తెలిసి అన్ని వర్గాల ప్రజలు తమ సమస్యలను విన్నవించేందుకు సీఎం క్యాంపు కార్యాలయానికి తరలివస్తున్నారు. సీఎం జగన్ను కలిసేందుకు ప్రజాప్రతినిధులు, పార్టీ నేతలు, ఉద్యోగులతో సహా వైకాపా కార్యకర్తలు ఆయన నివాసానికి వస్తున్నారు. ఇలా వచ్చే వారితో సీఎం నివాసం రద్దీగా మారుతోంది.
బాధితులు తమ సమస్యలను విన్నవించుకునేందుకు సీఎం నివాసం వద్ద గంటల తరబడి వేచి చూస్తున్నారు. సీఎంను కలిసేందుకు తమకు అవకాశం కల్పించాలని వేడుకుంటున్నారు. ఈ విషయం తెలుసుకున్న సీఎం వారి వినతులు తీసుకుని పరిష్కరించేందుకు ప్రత్యేకంగా అధికారులను నియమించారు. క్యాంపు కార్యాలయానికి వచ్చిన వారి వినతులను స్వీకరించి వారి సమస్యలను తెలుసుకుని పరిష్కరిస్తామని అధికారులు హామీ ఇస్తున్నారు. రోజుకు 4 విడతలుగా బయటకు వచ్చి ఫిర్యాదులు స్వీకరిస్తున్నారు.
జూలై నుంచి
సీఎంతో నేరుగా కలుస్తామని వేడుకుంటన్నబాధితులు కోసం... సీఎం జగన్ ప్రజాదర్బార్ ఏర్పాటు నిర్ణయం తీసుకున్నారు. తాడేపల్లి లోని సీఎం క్యాంపు కార్యాలయం ఆవరణలో ప్రత్యేకంగా భవనాన్ని నిర్మిస్తున్నారు. వచ్చే నెల మొదటివారం నుంచి ఈ కార్యక్రమాన్ని ప్రారంభించి, ప్రజలతో నేరుగా మాట్లాడాలని సీఎం నిర్ణయించారు. ప్రతి రోజూఉదయం అరగంట పాటు బాధితుల సమస్యలు తెలుసుకునేందుకు ప్రజాదర్బార్ నిర్వహించునున్నట్లు అధికారులు తెలిపారు.
ఇదీ చదవండి : ప్రజలతో నేరుగా... ఇకనుంచి జగన్ "ప్రజా దర్బార్"
