15న థియేటర్లు ఓపెన్..
కరోనా పరిస్థితుల నేపథ్యంలో ఆర్థిక వ్యవస్థను పట్టాలెక్కించే చర్యల్లో భాగంగా కేంద్ర ప్రభుత్వం అన్లాక్ 5.0 మార్గదర్శకాలను విడుదల చేసింది. సెప్టెంబర్‌ 30తో అన్లాక్ 4.0 గడువు ముగియనుండగా.. మరిన్ని మినహాయింపులతో కూడిన నూతన మార్గదర్శకాలను ఇవాళ విడుదల చేసింది. కంటైన్మెంట్ జోన్ల వెలుపల ఈ నెల 15 నుంచి సినిమా థియేటర్లు/ మల్టీప్లెక్సులు తెరిచేందుకు గ్రీన్‌ సిగ్నల్‌ ఇచ్చింది. అయితే 50 శాతం సీట్ల సామర్థ్యంతోనే వాటిని తెరిచేందుకు అనుమతిని ఇచ్చింది.
అక్టోబర్ 15 నుంచి కొవిడ్‌ నిబంధనలు పాటిస్తూ ఎగ్జిబిషన్లు, ఎంటర్‌టైన్‌మెంట్‌ పార్కులు తెరిచేందుకు కేంద్రం పచ్చ జెండా ఊపింది. అలాగే, క్రీడాకారుల శిక్షణార్థం స్విమ్మింగ్‌ పూల్స్‌ తెరిచే వెసులుబాటు కల్పించింది. కంటైన్మెంట్ జోన్లలో అక్టోబర్ 31 వరకు లాక్‌డౌన్‌ కొనసాగుతుందని కేంద్రం స్పష్టం చేసింది.
10 ఏళ్లలోపు పిల్లలు, గర్భిణీలు, 65 ఏళ్ల పైబడిన వారు తప్పక ఇంట్లోనే ఉండాలని కేంద్ర ఆరోగ్య శాఖ పేర్కొంది.
అక్టోబర్ 15 నుంచి స్కూళ్లు తెరిచే అంశంపై నిర్ణయం తీసుకునే వెసులుబాటును.. రాష్ట్రాలు/ కేంద్రపాలిత ప్రాంతాలకు కల్పించింది. ఈ అంశంలో విద్యాసంస్థలు, పాఠశాలల యాజమాన్యాలతో చర్చల తర్వాత నిర్ణయం తీసుకోనున్నట్లు స్పష్టం చేసింది కేంద్రం. అంతేకాకుండా ఈ అంశంలో పలు సూచనలు చేసింది.
- ఆన్‌లైన్‌ బోధన విధానం, దూరవిద్యకు ప్రాధాన్యం ఇవ్వాలని నిర్ణయం
- తల్లిదండ్రుల రాతపూర్వక అనుమతితోనే పాఠశాలల్లోకి విద్యార్థుల ప్రవేశం
- పాఠశాలల పునఃప్రారంభంపై రాష్ట్రాలు భద్రతా మార్గదర్శకాలు రూపొందించాలి
- పాఠశాల విద్యాశాఖ మార్గదర్శకాలకు అనుబంధంగా భద్రతా నిబంధనలు అమలు
- పునఃప్రారంభమయ్యే పాఠశాలలు నిబంధనలు తప్పనిసరిగా పాటించాలని నిర్ణయం
- కళాశాలల పునఃప్రారంభంపై ఉన్నత విద్యావిభాగం నిర్ణయాలు తీసుకోవచ్చు
