ఉత్తరాఖండ్లోని దెహ్రాదూన్ చంద్రమణి చౌక్ వద్ద ఘోర రోడ్డు ప్రమాదం జరిగింది. సహారన్పుర్ నుంచి వేగంగా వస్తున్న ఓ లారీ అదుపుతప్పి ముగ్గురు బైకర్లపైకి దూసుకొచ్చింది. ఈ ఘటన పటేల్ నగర్ పోలీస్ స్టేషన్ పరిధిలో జరిగింది. బైకర్లలో ఓ వ్యక్తి అక్కడికక్కడే మృతిచెందాడు. ఇద్దరు బైకర్లతో పాటు స్థానిక దుకాణదారుడు ఈ ఘటనలో గాయపడ్డాడు.
సమాచారం అందుకున్న పోలీసులు ఘటనా స్థలానికి చేరుకుని క్షతగాత్రులను ఆస్పత్రికి తరలించారు. దీంతో ఆ రోడ్డుపై భారీ ట్రాఫిక్ జామ్ అయ్యింది. ట్రాఫిక్ క్లియర్ చేయడానికి పోలీసులు చర్యలు తీసుకున్నారు. లారీ బ్రేకులు ఫెయిల్ కావడం వల్లే ఈ ప్రమాదం జరిగిందని పోలీసులు తెలిపారు. ఈ ఘటనపై దర్యాప్తు ప్రారంభించారు.
జనంపైకి దూసుకెళ్లిన ఎస్యూవీ..
బిహార్లో దారుణం జరిగింది. వేగంగా వస్తున్న ఓ ఎస్యూవీ జనంపైకి దూసుకెళ్లింది. ఈ ఘటనలో 15 మంది గాయపడగా.. తొమ్మిది మంది పరిస్థితి విషమంగా ఉంది.
పోలీసులు తెలిపిన వివరాల ప్రకారం.. సమస్తీపుర్ జిల్లా ముఫాసిల్ పోలీస్ స్టేషన్ పరిధిలో జిత్వార్‌పుర్‌లోని కన్హయ్య చౌక్ సమీపంలో.. ఓ మతపరమైన వేడుకలో భాగంగా పెద్ద సంఖ్యలో జనం గుమిగూడారు. వేగంగా వస్తున్న ఓ ఎస్యూవీ అదుపుతప్పి జనంపైకి దూసుకెళ్లింది. ఈ క్రమంలో తొక్కిసలాట జరిగింది.
ఈ ఘటనలో 15 మంది గాయపడ్డారు. సమాచారం అందుకున్న పోలీసులు ఘటనా స్థలానికి చేరుకుని.. గాయపడిన వారిని ఆస్పత్రికి తరలించారు. వారిలో 9 మంది పరిస్థితి విషమంగా ఉందని పోలీసులు తెలిపారు. ఎస్యూవీ డ్రైవర్ పారిపోవడానికి ప్రయత్నించగా.. అతడిని వెంబడించి అదుపులోకి తీసుకున్నారు పోలీసులు.
ఇవీ చదవండి : అదానీ పోర్టుకు వ్యతిరేకంగా 3వేల మంది నిరసన.. ఆజ్యం పోసిన మతపెద్దలు?.. సర్కారు గరం!
భర్త హత్య.. ఫ్రిడ్జ్లో 10 శరీర భాగాలు.. దిల్లీలో మరో 'శ్రద్ధ' తరహా దారుణం
