Precaution Dose Of Covid: ఒమిక్రాన్ విజృంభిస్తున్న నేపథ్యంలో దేశంలో సోమవారం(జనవరి 10) నుంచి ప్రికాషన్ డోసు పంపిణీ చేయడానికి సర్వం సిద్ధం అయ్యింది. ఆరోగ్య సిబ్బంది, ఫ్రంట్లైన్ వర్కర్లు, 60 ఏళ్లుపైబడి ఆరోగ్య సమస్యలు ఉన్నవారికి ప్రికాషన్ డోసు ఇవ్వనున్నారు. ఉత్తర్ప్రదేశ్, ఉత్తరాఖండ్, పంజాబ్, మణిపుర్, గోవాలో ఎన్నికల విధులు నిర్వర్తించనున్న సిబ్బందిని ఫ్రంట్లైన్ వర్కర్లుగానే పరిగణించనున్నారు. ఈ మేరకు ప్రికాషన్ డోసు కోసం అర్హులైనవారికి ఇప్పటికే ఎస్ఎమ్ఎస్లు పంపినట్లు కేంద్ర ఆరోగ్య మంత్రి మన్సుఖ్ మాండవీయ తెలిపారు.
1.05 కోట్ల ఆరోగ్య కార్యకర్తలు, 1.9 కోట్ల ఫ్రంట్లైన్ వర్కర్లు, 2.75 కోట్ల 60 ఏళ్ల పైబడినవారు ప్రికాషన్ డోసు వేసుకోనున్నారని అంచనా. ప్రికాషన్ డోసు కింద గతంలో తీసుకున్న వ్యాక్సిన్నే ఇవ్వనున్నట్లు కేంద్రం ఇప్పటికే ప్రకటించింది. కొవాగ్జిన్ తీసుకున్న వారికి కొవాగ్జిన్, కొవిషీల్డ్ తీసుకున్నవారికి కొవిషీల్డ్నే ఇవ్వనున్నారు.
కొవిడ్-19 ప్రికాషన్ డోసు పొందాలనుకుంటున్న లబ్ధిదారులు మళ్లీ కొత్తగా రిజిస్ట్రేషన్ చేసుకోవాల్సిన అవసరం లేదని కేంద్రం స్పష్టం చేసింది. ఇప్పటికే రెండు డోసులు తీసుకున్న అర్హులైన వారు నేరుగా అపాయింట్మెంట్ తీసుకోవటం లేదా నేరుగా వ్యాక్సినేషన్ కేంద్రానికి వెళ్లి టీకా తీసుకోవచ్చని తెలిపింది.
పోలీసుశాఖలో కలకలం:
ముంబయి పోలీసుశాఖలో కరోనా కలకలం రేపింది. 18 మంది సీనియర్‌ అధికారులు సహా 114 పోలీసులు వైరస్ బారినపడ్డారు. ఇందులో 13 మంది డీసీపీలు, నలుగురు అదనపు సీపీలు, సంయుక్త సీపీలు ఉన్నారు. గత 48 గంటల వ్యవధిలో కరోనాతో ఇద్దరు పోలీసులు మృతి చెందారు.
What Is Precaution Dose?
ప్రికాషన్ డోసుకు ప్రస్తుతం సరైన నిర్వచనం లేదు. టీకా రెండు డోసులు తీసుకున్నవారు.. మూడో డోసుగా వేరే రకం వ్యాక్సిన్ను తీసుకోవడాన్ని ప్రికాషన్ డోసు అనొచ్చని కొవిడ్ వ్యాక్సినేషన్ సాంకేతిక బృందం చెబుతోంది. అంటే.. కొవాగ్జిన్ టీకాలు తీసుకున్నవారికి మరో డోసుగా.. ఇతర వ్యాక్సిన్లు ఇవ్వడం అని అర్థం! ఇదే నిజమైతే.. మూడో డోసు తీసుకున్నామంటే.. అది పూర్తిగా కొత్త టీకా అవుతుంది.
రెండో డోసు తీసుకున్న తర్వాత 9 నుంచి 12 నెలలకు ప్రికాషన్ డోసు ఇవ్వనున్నట్లు తెలుస్తోంది. టీకా పంపిణీపై ఏర్పాటైన జాతీయ సాంకేతిక సలహా బృందం ఈ మేరకు కాలవ్యవధిపై సమాలోచనలు చేస్తోంది. శాస్త్రీయ పద్ధతుల్లో అంచనా వేసి దీనిపై తుది నిర్ణయం తీసుకోనున్నారు. త్వరలోనే దీనిపై ప్రకటన వచ్చే అవకాశం ఉంది.
ఇదీ చదవండి: 'మహా'లో 44 వేలు.. బంగాల్లో 24 వేల కరోనా కేసులు- ఆ రాష్ట్రాల్లో కఠిన ఆంక్షలు
