PM Modi news: భారత్లో త్వరలో ఆయుష్ గుర్తును ప్రారంభించనున్నట్లు చెప్పారు ప్రధాని నరేంద్ర మోదీ. దేశంలోని సంప్రదాయ ఔషధ ఉత్పత్తుల ప్రామాణికతను దీని ద్వారా గుర్తించవచ్చన్నారు. అంతేగాక సంప్రదాయ చికిత్సల కోసం భారత్కు వచ్చే విదేశీయులకు ఆయుష్ వీసా పేరుతో ప్రత్యేక కేటగిరీ వీసాలు మంజూరు చేయనున్నట్లు చెప్పారు.
గుజరాత్ మహాత్మా మందిర్లో మూడు రోజుల పాటు జరిగే 'గ్లోబల్ ఆయుష్ ఇన్వెస్ట్మెంట్ అండ్ ఇన్నోవేషన్' కార్యక్రమాన్ని బుధవారం ప్రారంభించారు మోదీ. అనంతరం మాట్లాడారు. 'భారత్లో త్వరలో ఆయుష్ గుర్తును పరిచయం చేస్తాం. ఇది దేశంలోని నాణ్యమైన ఆయుష్ ఉత్పత్తులకు ప్రామాణికతను ఇస్తుంది. అత్యాధునిక సాంకేతిక పరిజ్ఞానాన్ని ఉపయోగించి పరిశీలించిన ఉత్పత్తులకు ఈ మార్క్ ఇస్తాం. ఇది నాణ్యమైన ఆయుష్ ఉత్పత్తులను కొనుగోలు చేస్తున్నామనే విశ్వాసాన్ని ప్రపంచ దేశాల ప్రజలకు కల్పిస్తుంది' అని మోదీ అన్నారు.
ఈ కార్యక్రమంలో ప్రపంచ ఆరోగ్య సంస్థ డైరెక్టర్ జనరల్ టెడ్రోస్ అధనోమ్, మారిషస్ ప్రధాని ప్రవింద్ జుగ్నౌత్ పాల్గొన్నారు. టెడ్రోస్ మాట్లాడుతూ.. 'దీర్ఘకాలిక వ్యూహాత్మక పెట్టుబడులతో పాటు ప్రభుత్వ మద్దతు సంప్రదాయ ఔషధ రంగంలో ఆవిష్కరణలకు కీలకం. ఆవిష్కర్తలు, పరిశ్రమ, ప్రభుత్వం సుస్థిరంగా, పర్యావరణపరంగా సున్నితంగా సంప్రదాయ ఔషధాలను అభివృద్ధి చేయాలి' అని అన్నారు.
ఇదీ చదవండి: దేశ సైనికుల కోసం రోబో.. బాలమేధావి ఆవిష్కరణ
