Haryana Bride: హరియాణా సోనిపత్లోని పల్దీ గ్రామంలో నవవధువుపై తుపాకీతో కాల్పులకు పాల్పడ్డాడు ఓ కిరాతకుడు. పెళ్లయిన కొద్ది గంటల తర్వాత ఆమె తన భర్త, మరో బంధువుతో కలిసి కారులో వెళ్తుండగా ఈ అఘాయిత్యానికి ఒడిగట్టాడు. నిందితుడు బాధితురాలి పక్కింటి వ్యక్తే అని తెలుస్తోంది. ఆమెను అతడు రెండు నెలలుగా వేధిస్తున్నట్లు సమాచారం. గతవారం జరిగిన ఈ ఘటన ఆలస్యంగా వెలుగులోకి వచ్చింది.
20ఏళ్ల బాధితురాలు తనిష్కకు.. మోహన్తో ఇటీవలే వివాహమైంది. బంధువుతో కలిసి ఇద్దరు కారులో భాలి-అనందపుర్ గ్రామానికి వెళ్తండగా ఎస్యూవీ వాహనంలో వచ్చిన ముగ్గురు కారును ఆపారు. అందులో ఇద్దరు వాహనం దిగి కారు డోరు తీయమని అడిగారు. డ్రైవింగ్ చేస్తున్న బంధువు డోరు తీయగానే నిందితుడు తనిష్కపై తుపాకీతో బుల్లెట్ల వర్షం కురిపించాడు. అడ్డు వచ్చిన బంధువును చితకబాదాడు. అనంతరం గాల్లోకి కాల్పులు జరిపి అతని వద్ద నుంచి బంగారు గొలుసులు లాక్కెళ్లారు. డిసెంబర్ 1న ఈ ఘటన జరిగింది. తీవ్రంగా గాయపడిన బాధితురాలు రోహ్తక్లోని ఆస్పత్రిలో చికిత్స పొందుతోంది. ఆమె పరిస్థితి విషమంగా ఉన్నట్లు పోలీసులు చెప్పారు. భర్త ఫిర్యాదు మేరకు కేసు నమోదు చేశారు.
నిందితుడు సాహిల్ సహా మరో ఇద్దరు మైనర్లను ఈ కేసుకు సంబంధించి డిసెంబర్ 5న అరెస్టు చేసినట్లు పోలీసులు వెల్లడించారు. తనిష్కపై కాల్పులు జరపడానికి 4 గంటల ముందు నిందితులు స్థానిక వ్యాపారవేత్త ఎస్యూవీని దొంగిలించారని చెప్పారు. ఘటన అనంతరం వాహనాన్ని ఓ దాబా సమీపంలో వదిలి వెళ్లారని వివరించారు. తాను ఇంటికి తిరిగి వస్తుండగా ముసుగు ధరించిన ముగ్గురు వ్యక్తులు తుపాకులతో బెదిరించి ఎస్యూవీని దొంగిలించారని వ్యాపారవేత్త పోలీసులకు వాంగ్మూలం ఇచ్చాడు.
ఈ ఘటనపై విశ్వహిందూ పరిషత్ అధికార ప్రతినిధి సురేందర్ జైన్ స్పందించారు. బాధితురాలి గ్రామంలో రెండుసార్లు పంచాయతీ సమావేశం ఏర్పాటు చేసినట్లు చెప్పారు. ఇలాంటి ఘటనలు పునరావృతం కాకుండా 'లవ్ జిహాద్' చట్టాన్ని తీసుకురావాలని గ్రామస్థులు కోరినట్లు చెప్పారు.
హరియాణా సీనియర్ పోలీసు అధికారి మాత్రం ఈ ఘటనకు ఇతర సామాజిక కారణాలు లేవని తాము భావిస్తున్నట్లు స్పష్టం చేశారు.
ఇదీ చదవండి: అప్పుడే పుట్టిన పసికందును చంపి.. టాయిలెట్ ఫ్లష్లో వేసిన తల్లి
