100 ఇళ్లల్లో దొంగతనం- 20సార్లు జైలుకు, గోవాలో మరోసారి 'ఎస్కేప్​ కార్తీక్' అరెస్ట్​​

Escape Karthik Arrested : వందకుపైగా ఇళ్లల్లో దొంగతనం చేసిన ఎస్కేప్​ కార్తీక్​ను మళ్లీ కర్ణాటక పోలీసులు అరెస్టు చేశారు. ఇప్పటి వరకు అతడిని 20 సార్లు అరెస్ట్​ చేసినట్లు పోలీసులు తెలిపారు. ఇంతకీ ఆ ఎస్కేప్​ కార్తీక్ ఎవరు?

Escape Karthik Arrested : వంద కేసుల్లో నిందితుడిగా ఉన్న ఓ ఘరానా దొంగను కర్ణాటక​ పోలీసులు మరోసారి అరెస్టు చేశారు. ఇళ్ల దొంగగా పేరుగాంచిన కార్తీక్ కుమార్ అలియాస్ ఎస్కేప్​ కార్తీక్​ను.. ఓ కేసు విషయంలో గోవాకు వెళ్లిన పోలీసులు అతడిని అదుపులోకి తీసుకున్నారు. జల్సాలకు బానిసైన కార్తీక్.. విలాసవంతమైన జీవితం కోసం ఇళ్లలో దొంగతనాలు చేయడం అలవాటుగా చేసుకున్నాడని పోలీసులు తెలిపారు. ఇప్పటి వరకు వందకు పైగా ఇళ్లలో చోరీలు చేసినట్లు పేర్కొన్నారు.

కర్ణాటకలోని హెన్నూర్​కు చెందిన కార్తీక్​.. 16 ఏళ్ల వయసు నుంచే దొంగతనాలు చేయడం ప్రారంభించాడు. జల్సాల కోసం ఇళ్లలో చోరీలకు పాల్పడటం అలవాటుగా మార్చుకున్నాడు. కార్తీక్​కు వివాహమై ఇద్దరు పిల్లలు ఉన్నారు. ఇప్పటి వరకు కామాక్షిపాళ్య, హెన్నూరు, కొత్తనూరు, మైసూర్, హసన్​ జిల్లాల్లో వందకు పైగా ఇళ్లలో చోరీలు చేశాడు. వివిధ కేసుల్లో బెంగళూరు పోలీసులు అతడిని ఇప్పటివరకు 20 సార్లు అరెస్టు చేశారు.

2008లో ఓ చోరీ కేసులో అరెస్టయ్యాడు కార్తీక్​. ఆ సమయంలో పరప్పన అగ్రహార సెంట్రల్​ జైలులో భోజనం పంపిణీ చేసేందుకు వచ్చిన వాహనంలో దాక్కుని పరారయ్యాడు. మళ్లీ 45 రోజుల తరువాత పోలీసులకు పట్టుబడ్డాడు. 2010లో మరోసారి పోలీసుల కస్టడీ నుంచి తప్పించుకుని కొన్నిరోజుల తరువాత మళ్లీ దొరికాడు. దీంతో అతడికి ఎస్కేప్​ కార్తీక్​ అనే పేరు వచ్చింది. ఇలా చోరీ కేసులో అరెస్టు అవ్వడం.. జైలు లేదా పోలీసుల అదుపులో నుంచి తప్పించుకుని మళ్లీ దొంగతనాలకు పాల్పడటం అతడికి​ అలవాటుగా మారింది. అయితే కార్తీక్​ను మరో కేసులో హెన్నూరు పోలీసులు గతేడాది నవంబర్​లో అరెస్టు చేశారు. బెయిల్​పై బయటకు వచ్చిన కార్తీక్​ను.. ఓ కేసు విషయంలో గోవాకు వెళ్లిన గోవిందరాజనగర్​ పోలీసులు మళ్లీ అరెస్టు చేశారు. కార్తీక్​ను అదుపులోకి తీసుకుని విచారణ చేస్తున్నట్లు తెలిపారు.

1990 నుంచి పరారీలో గజదొంగ.. 33 ఏళ్ల తర్వాత ఎట్టకేలకు అరెస్ట్
కొన్న నెలల క్రితం.. అనేక దొంగతనాలు చేసి పోలీసులకు చిక్కకుండా తిరుగుతున్న ఓ గజదొంగను 33 సంవత్సరాల తరువాత పట్టుకున్నారు. 1990లో బిహార్​లో అనేక దొంగతనాలు చేసిన నిందితుడిని.. అతడి ఇంట్లోనే అరెస్ట్ చేశారు పోలీసులు. మరి ఆ దొంగ ఇన్నాళ్లు ఎలా తప్పించుకున్నాడో? ఎక్కడ తలదాచుకున్నాడో తెలుసుకోవాంటే ఈ లింక్​ పై క్లిక్​ చెయ్యండి.