DIG Press conference at Rajahmundry Central Jail: తెలుగుదేశం అధినేత చంద్రబాబు ఆరోగ్యంపై... రాజమండ్రి సెంట్రల్ జైల్ ఆవరణలో ప్రభుత్వ వైద్యులు, జైళ్ల శాఖ డీఐజీ రవికిరణ్... మీడియా సమావేశం నిర్వహించారు. ప్రస్తుతానికి చంద్రబాబు ఆరోగ్య పరిస్థితి నిలకడగా ఉందని వైద్యులు తెలిపారు. చంద్రబాబును చల్లగా ఉండే ప్రదేశంలో ఉంచాలని వైద్యులు సూచించించారు. ఆయనకు చల్లని వాతావరణం అవసరమని ప్రభుత్వ వైద్యులు పేర్కొన్నారు. గతంలో ఉన్న ఆరోగ్య సమస్యలు ఏమిటో తమకు తెలియదని వైద్యులు తెలిపారు. చంద్రబాబుకు స్టెరాయిడ్స్ ఇవ్వడం లేదని పేర్కొన్నారు. చంద్రబాబు వేసుకున్న మందులను మాకు చూపించారని.. వాడే మందులు చూశాకే మిగతా మందులు సూచించినట్లు వైద్యులు వెల్లడించారు.
జైలులో ఏసీలు పెట్టేందుకు ప్రిజన్ రూల్స్ ఒప్పుకోవు: నిన్న వైద్యులు ఇచ్చిన నివేదికను కోర్టుకు పంపించినట్లు పోలీసు అధికారులు తెలిపారు. ఇవాళ్టి వైద్యుల నివేదికనూ కోర్టుకు వెంటనే పంపిస్తామని పోలీసులు వెల్లడించారు. చంద్రబాబు లాంటి ప్రముఖ వ్యక్తి విషయంలో జాగ్రత్తగా ఉంటామని డీఐజీ రవికిరణ్ పేర్కొన్నారు. చంద్రబాబు ఆహార అలవాట్లు ఏమిటో వైద్యులు తెలుసుకున్నారని అందుకు తగినట్లు వైద్యం అందిస్తున్నట్లు తెలిపారు. వ్యక్తిగత వైద్యుడి సలహాతో మందులు వాడతానని చంద్రబాబు చెప్పారని పేర్కొన్నారు. జైలులో ఏసీలు పెట్టేందుకు ప్రిజన్ రూల్స్ ఒప్పుకోవని జైలు అధికారులు తెలిపారు. ప్రత్యేక కేసుగా పరిగణించి కోర్టు ఆదేశిస్తే అప్పుడు చూస్తామని పేర్కొన్నారు. ములాఖత్ సమయం వచ్చిన ఆరోపణలపై ఆయన వివరణ ఇచ్చారు. ములాఖత్ పూర్తయ్యిందని గుర్తుచేయడం తమ బాధ్యత అనీ... తాము ఎవరితోనూ దురుసుగా ప్రవర్తించదని, పోలీసు వెల్లడించారు.
చంద్రబాబుతో ములాఖత్లో కుటుంబ సభ్యుల ఆందోళన: రాజమహేంద్రవరంలో చంద్రబాబుతో ములాఖత్ అనంతరం ఆయన ఆరోగ్య పరిస్థితి చూసి కుటుంబసభ్యులు తీవ్ర భావోద్వేగానికి గురయ్యారు. ఆయన ఆరోగ్య పరిస్థితిపై తీవ్ర భావోద్వేగం చెందారు. ఆయన మానసికంగా ధైర్యంగా ఉన్నా...శారీరక సమస్యలపై కుటుంబ సభ్యులు ఆందోళన చెందుతున్నారు. గత ములాఖత్లో ఆరోగ్యంగా కనిపించిన చంద్రబాబు.. నేడు బలహీనంగా ఉన్నట్లు తెలిసింది. చంద్రబాబు ఆరోగ్యంపై అక్కడే ఉన్న జైళ్లశాఖ డీఐజీ రవికిరణ్‌ను లోకేశ్ ప్రశ్నించారు.
చంద్రబాబు ఆరోగ్యంపై ఆందోళన వ్యక్తం చేసిన నారా లోకేశ్: అనారోగ్య కారణాలతో చంద్రబాబును అంతమొందించే కుట్ర జరుగుతోందని... నారా లోకేశ్ ఇప్పటికే ఆరోపణలు చేశారు. వ్యవస్థలను మేనేజ్ చేస్తూ, రిమాండ్ లోనే ఉంచాలనే కుట్ర జరుగుతోందని ఆరోపించారు. భద్రత లేని జైలులో బాబు ఆరోగ్యం క్షీణించేలా చేసి ప్రాణ హాని తలపెడుతున్నారని ఆవేదన వ్యక్తం చేశారు. చంద్రబాబు ఆరోగ్యంపై జైలు అధికారుల తీరు సందేహాస్పదంగా ఉందన్నారు. జైలు పరిసరాలు అపరిశుభ్రంగా ఉన్నాయన్నారు. దోమలు ఎక్కువ ఉన్నాయన్నా పట్టించుకోలేదని... సరిగా తిరగని ఫ్యాన్ పెట్టారని మండిపడ్డారు.
