Corona virus cases: దేశంలో పలు రాష్ట్రాల్లో కొవిడ్ ఉద్ధృతి ఆందోళనకర స్థాయిలో కొనసాగుతోంది. ముఖ్యంగా మహారాష్ట్రలో గత కొన్ని రోజులుగా రికార్డు స్థాయిలో కేసులు నమోదవుతుండడం ఆందోళన కలిగిస్తోంది. జూన్‌ తొలివారంలో పాజిటివ్‌ కేసుల సంఖ్య ఐదు వేలుగా ఉండగా.. ప్రస్తుతం అది 17వేలకు దాటింది. ఇలా గడిచిన 10 రోజుల్లోనే కొవిడ్ క్రియాశీల కేసుల్లో 241శాతం పెరుగుదల కనిపించిందంటే పరిస్థితి అర్థం చేసుకోవచ్చు. ఇక మహారాష్ట్రలో కొవిడ్ పాజిటివిటీ రేటు కూడా గణనీయంగా పెరుగుతుండటం వల్ల కొవిడ్ మరణాల రేటు 1.86శాతంగా నమోదైంది.
మహారాష్ట్రలో ఆదివారంతో పోలిస్తే సోమవారం కొత్త కేసులు భారీగా తగ్గాయి. ఆదివారం 2,946 కేసులు రాగా.. సోమవారం రెండు వేల దిగువకు చేరి 1,885 మందికి వైరస్ సోకింది. ఒకరు మరణించారు. దీంతో రాష్ట్రంలో మొత్తం కేసుల సంఖ్య 79,12,462, మరణాల సంఖ్య 1,47,871కి చేరింది. ఒక్క ముంబయిలోనే 1,118 కేసులు వచ్చాయి. అయితే క్రితం రోజుతో పోలిస్తే.. 38 శాతం తగ్గటం కాస్త ఊరట కలిగించే విషయమే. ముగ్గురిలో బీఎ4, బీఏ5 వేరియంట్లు నిర్ధరణ కాగా..వారు ఇప్పటికే వైరస్ నుంచి కోలుకున్నారు.
కేసులు పెరుగుతున్నా.. స్వల్ప లక్షణాలే.. కొన్ని నెలల క్రితం వరకూ కొవిడ్ వ్యాప్తి అదుపులోనే ఉన్నప్పటికీ మే నెల నుంచి మళ్లీ క్రమంగా పెరగడం ప్రారంభించింది. మే నెలలో మహారాష్ట్రలో 9354 పాజిటివ్‌ కేసులు నమోదుకాగా అందులో 5980 కేసులు కేవలం ముంబయి మహానగరంలోనే నమోదయ్యాయి. అంతేకాకుండా ఈ నెలలో 17 కొవిడ్ మరణాలు చోటుచేసుకున్నాయి. ఇక జూన్‌ నెలలో ఈ వైరస్ ఉద్ధృతి మరింత పెరగగా.. మొదటి 12 రోజుల్లోనే 23,941 కేసులు వెలుగు చూశాయి. వీటిలో 15,945 కేసులు ఒక్క ముంబయి నగరంలోనే బయటపడ్డాయి. జూన్‌లో ఈ 12 రోజుల్లో 12 కొవిడ్ మరణాలు చోటుచేసుకున్నాయి. మహారాష్ట్రలో కొవిడ్ ఉద్ధృతి పెరుగుతున్నప్పటికీ బాధితుల్లో లక్షణాలు మాత్రం స్వల్పంగానే ఉంటున్నట్లు వైద్య నిపుణులు చెబుతున్నారు. కొవిడ్ వల్ల ప్రాణాలు కోల్పోయే పరిస్థితులు కూడా చాలా తక్కువేనని వెల్లడిస్తున్నారు. అంతేకాకుండా తాజా వేవ్‌కు కొత్తరకం వేరియంట్ కాకపోవచ్చని వైద్యనిపుణులు అంచనా వేస్తున్నారు.
నాలుగో వేవ్పై ఆందోళన.. దేశంలో కరోనా కేసులు రోజు రోజుకి పెరిగిపోవడం ఆందోళన కలిగిస్తోంది. ఆదివారం ఒక్కరోజే 8వేలకు పైగా కొత్త కేసులు నమోదవడంతో.. నాలుగోవ్‌వేవ్‌కు సంకేతమా అన్న అనుమానాలు వ్యక్తమవుతున్నాయి. ఈ నేపథ్యంలో ఈ ఏడాది ఫిబ్రవరిలో నాలుగో వేవ్పై ఐఐటీ కాన్పూర్‌ పరిశోధకులు వేసిన అంచనా చర్చనీయాంశంగా మారింది. జూన్‌లో కరోనా నాలుగో వేవ్‌మొదలయ్యో అవకాశం ఉందని... జూన్‌22 నుంచి అక్టోబర్‌24 వరకు ఈ ప్రభావం ఉండచ్చని ఐఐటి పరిశోధకులు తెలిపారు. కొత్త వేరియంట్లు, మ్యుటేషన్లు, వ్యాక్సిన్‌లు, బూస్టర్‌డోసుల ఆధారంగా కరోనా నాలుగో వేవ్‌ఆధారపడి ఉంటుందని పేర్కొన్నారు. ఆగస్టు 15 నుంచి 31 వరకు కరోనా కేసులు గరిష్ఠ స్థాయికి చేరుకుని ఆ తర్వాత తగ్గుముఖం పట్టే అవకాశం ఉందని స్పష్టం చేశారు. మరోవైపు దేశంలో ఆందోళన కలిగించే కొత్త వేరియంట్ ఏదీ లేదని.. తాత్కలికంగా కేసులు పెరిగిన నాలుగో వేవ్‌కి అవకాశం లేకపోవచ్చని కొంతమంది ఆరోగ్య నిపుణులు చెబుతున్నారు.
కేంద్రం హెచ్చరిక: దేశంలోని పలు రాష్ట్రాల్లో కొవిడ్ కేసులు భారీగ నమోదవుతున్న క్రమంలో హెచ్చరించారు కేంద్ర వైద్య, ఆరోగ్య శాఖ మంత్రి మాన్సుఖ్ మాండవియా. మహమ్మారి ఇంకా ముగిసిపోలేదని, కొవిడ్ నిబంధనలు పాటిస్తూ అప్రమత్తంగా ఉండాలని స్పష్టం చేశారు. రాష్ట్రాలు, కేంద్ర పాలిత ప్రాంతాలు నిఘాను పెంచుతూ కొత్త వేరియంటను గుర్తించేందుకు జినోమ్ సీక్వెన్సింగ్ పరీక్షలను నిర్వహించాలన్నారు. హర్ గర్ దస్తక్ 2.o కార్యక్రమంలో వ్యాక్సినేషన్ ప్రోగ్రెస్పై రాష్ట్రాల ఆరోగ్య శాఖ మంత్రులు, ఉన్నతాధికారులతో వర్చువల్గా సమీక్ష నిర్వహించారు మాండవియా. కరోనా పరీక్షలు పెంచి సరైన సమయంలో కేసులను గుర్తించటం ద్వారా వైరస్ వ్యాప్తిని అరికట్టవచ్చన్నారు. టెస్ట్, ట్రాక్, ట్రీట్, వ్యాక్సినేషన్, కొవిడ్ నిబంధనలు పాటించటం వంటి 5 దశల వ్యూహాన్ని అవలంభించాలన్నారు.
ఇదీ చూడండి: 'ఏడు జన్మలు కాదు.. ఏడు సెకన్లు కూడా ఈ భార్యలు మాకొద్దు దేవుడా'
పోలీస్ జీపు చోరీ చేసి అత్తారింటికి.. దుస్సాహసంతో కటకటాల్లోకి..
