ఉద్ధృతంగా ఫ్రాన్స్​ నిరసనలు

ఫ్రాన్స్​ అధ్యక్షుడు ఇమ్మాన్యుయేల్​ మేక్రాన్​కు వ్యతిరేకంగా చేపట్టిన పచ్చ కోటు నిరసనలు 12వ వారానికి చేరుకున్నాయి.

ఫ్రాన్స్​ అధ్యక్షుడు ఇమ్మాన్యుయేల్​ మేక్రాన్ ​ ప్రభుత్వానికి వ్యతిరేకంగా చెలరేగిన నిరసనలు ఉద్రిక్తంగా మారాయి. ఇప్పటి వరకు 2 వేల మంది పచ్చ కోటు​ ఆందోళనకారులు గాయపడ్డారు. చమురు ధరల పెరుగుదలను నిరసిస్తూ మొదలైన ఆందోళనలు చినికి చినికి గాలి వానగా మారాయి. అధ్యక్షుడు మేక్రాన్​ పదవి నుంచి వైదొలగాలని చేస్తోన్న నిరసనలు 12వ వారానికి చేరుకున్నాయి. తాజాగా మరోమారు వందల మంది నిరసనకారులు ఫ్రాన్స్​లోని వివిధ నగరాల్లో ఆందోళనలు చేపట్టారు. ప్రభుత్వానికి వ్యతిరేకంగా నినాదాలు చేస్తూ వీధుల్లో ప్రదర్శనలు చేపట్టారు. వారిని చెదరగొట్టడానికి పోలీసులు బాష్పవాయువు ప్రయోగించారు.

2018 నవంబర్​ 17 లో మొదలైన ఆందోళనల్లో ఇప్పటి వరకు సుమారు 2 వేల మంది గాయపడ్డారని ప్రభుత్వం తెలిపింది. నిరసనలకు సంబంధించిన రోడ్డు ప్రమాదాల్లో 10 మంది మరణించినట్లు వెల్లడించింది.