తూర్పు ఉత్తర ప్రదేశ్ ఏఐసీసీ ప్రధాన కార్యదర్శిగా ప్రియాంక గాంధీ బాధ్యతలు స్వీకరించారు. దిల్లీలోని కాంగ్రెస్ ప్రధాన కార్యాలయంలో అధికారికంగా బాధ్యతలు చేపట్టారు. అక్కడకు వచ్చిన పార్టీ నేతలు, కార్యకర్తలతో సమావేశమయ్యరు.
గతనెల 23న ప్రియాంకను తూర్పు ఉత్తర ప్రదేశ్ ఏఐసీసీ కార్యదర్శిగా నియమించారు కాంగ్రెస్ పార్టీ అధ్యక్షుడు, ప్రియాంక సోదరుడు రాహుల్ గాంధీ.
అక్బరు రోడ్డులోని పార్టీ ప్రధాన కార్యాలయంలో రాహుల్ గాంధీ, ప్రియాంక గాంధీ గదులు పక్క పక్కనే ఉండేలా ఏర్పాటు చేశారు.
రాహుల్ గాంధీ అధ్యక్షతన గురువారం జరిగే పార్టీ కార్యదర్శుల సమావేశానికి మొదటిసారి అధికారిక హోదాలో హాజరవుతారు ప్రియాంక.
వాద్రాకు పూర్తి మద్దతుగా ఉంటా: ప్రియాంక
అక్రమాస్తుల కేసులో ఈడీ విచారణకు హాజరైన భర్త రాబర్ట్ వాద్రాకు తోడుగా ఈడీ కార్యాలయం వరకు వెళ్లారు ప్రియాంక. అనంతరం అక్కడినుంచి నేరుగా కాంగ్రెస్ పార్టీ ప్రధాన కార్యాలయం చేరుకున్నారు.
ఈ కేసులో తన కుటుంబ సభ్యులకు పూర్తి మద్దతుగా ఉంటానని తెలిపారు ప్రియాంక. రాబర్ట్ వాద్రాకు అన్ని విధాలా సహకారమందిస్తామని స్పష్టం చేశారు.
