సెప్టెంబరు 7 నుంచి దేశవ్యాప్తంగా మెట్రో సేవలు తిరిగి ప్రారంభం కానున్నాయి. ఇందుకు సంబంధించిన మార్గదర్శకాలను కేంద్ర గృహ, పట్టణ వ్యవహారాల మంత్రి హర్దీప్ సింగ్ పూరి విడుదల చేశారు. కంటైన్మెంట్ జోన్లలోని స్టేషన్లు మూసివేసే ఉంటాయని వెల్లడించారు.
మార్గదర్శకాలు ఇవే
- మాస్క్ లు తప్పనిసరిగా ధరించాలి. లేకపోతే స్టేషన్లోకి అనుమతించరు.
- స్టేషన్లు, ప్లాట్ ఫాం, మెట్రోలో భౌతిక దూరం తప్పనిసరిగా పాటించాలి.
- డబ్బులు చెల్లించి తీసుకునేందుకు అన్ని మెట్రో స్టేషన్లలో మాస్క్ లు అందుబాటులో ఉంచాలి.
- ఎటువంటి లక్షణాలు లేని వారిని శరీర ఉష్ణోగ్రత పరిశీలించాకే లోనికి అనుమతిస్తారు.
- అన్ని ప్రవేశ, నిష్క్రమణలు, లిఫ్ట్ లు, ఎస్కలేటర్ల ప్రదేశాల్లో శానిటైజర్ తప్పనిసరిగా అందుబాటులో ఉంచాలి.
- నేరుగా డబ్బు చెల్లించే అన్ని పద్ధతులు నిలిపివేయాలి.
- అత్యంత తక్కువ లగేజ్ను ప్రయాణికులు తీసుకురావాలి.
- రైళ్లలో ఏసీ సరఫరాలో గాలి మారేందుకు తగిన విధంగా ఏర్పాట్లు చేయాలి.
- ప్రయాణికులకు అవగాహన కోసం ప్రత్యేక ఏర్పాట్లు చేయాలి.
- మెట్రో రైలు కార్పొరేషన్లు, రాష్ట్ర ప్రభుత్వం సహా స్థానిక పాలనా సిబ్బంది, పోలీసులతో ఎప్పటికప్పుడు సమన్వయం చేసుకోవాలి.
- మెట్రో స్టేషన్ల వద్ద రద్దీ లేకుండా చర్యలు చేపట్టాలి.
