బృహత్ బెంగళూరు మహానగర పాలక సంస్థ అతిపెద్ద కరోనా కేర్ సెంటర్ను ప్రారంభించనుంది. దేశంలో ఎక్కడా లేనివిధంగా 10,100 పడకలతో ఏర్పాటైందీ చికిత్సాలయం.
కర్ణాటకలో కరోనా కేసులు రోజురోజుకీ పెరిగిపోతున్నాయి. దీంతో, వైరస్ వ్యాప్తిని అరికట్టేందుకు ప్రభుత్వం చర్యలు ముమ్మరం చేసింది. అందులో భాగంగానే.. పదివేల కరోనా బాధితులకు ఒకేసారి వైద్యం అందించే విధంగా ఈ ఆసుపత్రిని ఏర్పాటు చేసింది.
సకల వసతుల కేంద్రం...
తుమకూరు రోడ్లోని బెంగళూరు ఇంటర్నేషనల్ ఎగ్జిబిషన్ సెంటర్లో(బీఐఈసీ) నిర్మించిన ఈ ప్రత్యేక చికిత్సాలయంలో.. సకల వసతులు ఉన్నాయి. వంద ఐసీయూ పడకలు.. ఫ్యాన్లు, టీవీలు, న్యూస్ పేపర్లు, మ్యాగజైన్లు ఇక్కడ అందుబాటులో ఉంటాయి. అంతే కాదు.. రోగ నిరోధక శక్తి పెంచే ఆహారాన్ని అక్కడే వండి రోగులకు అందించేందుకు విశాలమైన కిచెన్ కూడా ఉంది.
సీనియర్ ఐఏఎస్ అధికారుల బృందం పర్యవేక్షణలో నిర్మితమైన ఈ ఆసుపత్రిని, కేంద్ర ప్రభుత్వం తరఫున ఓ అధికారుల బృందం సందర్శించింది. అధునాతన సాంకేతికతతో, అతి తక్కువ కాలంలో ఆసుపత్రిని నిర్మించినందుకు కర్ణాటక ప్రభుత్వాన్ని ప్రశంసించింది.
ముఖ్యమంత్రి బీఎస్ యడియూరప్ప పలువురు క్యాబినేట్ మంత్రులతో కలిసి ఈ ఆసుపత్రిని సందర్శించారు. అయితే, ఈ పదివేల పడకల ఆసుపత్రిలో చికిత్స పొందేందుకు, బెంగళూరువాసులకే ప్రథమ ప్రాధాన్యం ఇస్తామని.. ఆ తర్వాతే ఎవరికైనా.. అని ఆ రాష్ట్ర ప్రభుత్వం స్పష్టం చేసింది.
ఇదీ చదవండి: లాక్డౌన్ భయంతో ఖాళీ అవుతున్న రాజధాని!
