రఫేల్పై నరేంద్ర మోదీని విమర్శిస్తూ కాంగ్రెస్ నేత రాహుల్ గాంధీ చేసిన వ్యాఖ్యలకు క్షమాపణ చెప్పాలని దేశంలోని పలు ప్రాంతాల్లో ఆందోళన చేపట్టింది భాజపా. దేశవ్యాప్త ఆందోళనలో భాగంగా మహారాష్ట్రలోనూ నిరసన ప్రదర్శనలు చేపట్టారు కాషాయ దళం కార్యకర్తలు. రాహుల్కు వ్యతిరేకంగా నినాదాలు చేశారు. మోదీపై కాంగ్రెస్ నేత చేసిన వ్యాఖ్యలతో దేశం పరువుపోయిందని మహారాష్ట్ర భాజపా చీఫ్ చంద్రకాంత్ పాటిల్ విమర్శించారు. సుప్రీంకోర్టుకు రాహుల్ చెప్పిన క్షమాపణలు సరిపోవని వ్యాఖ్యానించారు.
"ప్రపంచంలో భారత్ను సర్వోత్తమ స్థితిలో ఉంచిన మోదీని... వారు(కాంగ్రెస్, రాహుల్) కించపరచడానికి ప్రయత్నిస్తున్నారు. కేవలం వారి స్వార్థ ప్రయోజనాల కోసమే ఇలాంటి వ్యాఖ్యలు చేస్తున్నారు. వారి వల్ల దేశం తన ప్రతిష్ఠ కోల్పోవాల్సివస్తోంది. కోర్టు ముందు చెప్పిన క్షమాపణలు సరిపోవు, దేశ ప్రజలకు కాంగ్రెస్, రాహుల్ గాంధీ క్షమాపణ చెప్పాలి."-చంద్రకాంత్ పాటిల్, మహారాష్ట్ర భాజపా అధ్యక్షుడు.
బంగాల్లో...
రఫేల్ విషయంలో దేశ ప్రజలకు అసత్యాలు చెప్పినందుకు కాంగ్రెస్ అధ్యక్షుడు క్షమాపణలు చెప్పాలని బంగాల్లో భాజపా కార్యకర్తలు ర్యాలీ నిర్వహించారు. కాంగ్రెస్ పార్టీ ప్రధాన కార్యాలయం ముందు ఆందోళనకు దిగారు. మౌలాలీ నుంచి బిధన్ భవన్ వరకు ర్యాలీ నిర్వహించిన భారతీయ యువ మోర్చా కార్యకర్తలు... రాహుల్కు వ్యతిరేకంగా పెద్ద ఎత్తున నినాదాలు చేశారు.
దిల్లీలోనూ...
దిల్లీలో భాజపా రాష్ట్ర అధ్యక్షుడు మనోజ్ తివారీ నేతృత్వంలో ఆమ్ ఆద్మీ పార్టీ కార్యాలయం ఎదుట ధర్నా జరిగింది. మోదీపై బురద చల్లడానికి నిరాధారమైన ఆరోపణలు చేసింనందుకు ఆమ్ ఆద్మీ పార్టీ క్షమాపణ చెప్పాలని కార్యకర్తలు డిమాండ్ చేశారు.
