Brother killed sister: మహారాష్ట్ర ఔరంగాబాద్లో పరువు హత్య కలకలం రేపింది. వేరే కులానికి చెందిన వ్యక్తిని పెళ్లి చేసుకుందనే కారణంతో సొంత సోదరిని అతికిరాతకంగా హత్య చేశాడు ఓ యువకుడు.
తల్లి సహాయంతో!
గోయేగావ్ గ్రామానికి చెందిన 19ఏళ్ల యువతి.. వైజాపుర్లోని లడ్గావ్కు చెందిన వ్యక్తితో ప్రేమలో పడింది. ఆరు నెలల క్రితం ఇంట్లో నుంచి వెళ్లిపోయి పుణెలో వారు పెళ్లి చేసుకున్నారు. ఆ తర్వాత వారిద్దరు లడ్గావ్లో నివాసముంటున్నారు.
కొన్ని రోజుల క్రితం.. ఆ యువతి తల్లి ఆమెను కలిసింది. ఆమె ఫోన్ నెంబర్ తీసుకుంది. ఆదివారం నాడు.. ఆ యువతి తల్లి, సోదరుడు లడ్గావ్కు వెళ్లారు. యువతి ఇంటి వద్ద ద్విచక్రవాహనాన్ని ఆపి ఆమె సోదరుడు ఇంటి లోపలికి వెళ్లాడు.
ఆ సమయంలో ఆ యువతి వంటింట్లో పని చేసుకుంటోంది. సోదరిని చూసిన వెంటనే.. కోపం తెచ్చుకున్న యువకుడు ఆమెపై దాడి చేశాడు. కొడవలితో ఆమె తలను నరికి.. శరీరం నుంచి వేరు చేశాడు.
ఈ దృశ్యాలు పక్కనే ఉన్న ఆ యువతి భర్త చూసి షాక్కు గురయ్యాడు. వెంటనే తేరుకుని, ప్రాణాలు రక్షించుకునేందుకు అక్కడి నుంచి పారిపోయాడు. ఈ ఘటన స్థానికంగా కలకలం సృష్టించింది. చుట్టుపక్కన ప్రజలు పోలీసులకు సమాచారాన్ని అందించారు. ఘటనాస్థలానికి చేరుకున్న పోలీసులు.. నిందితుడు, అతడి తల్లిని అరెస్టు చేశారు. కేసులో దర్యాప్తును ముమ్మరం చేశారు.
ఇదీ చూడండి:- పెళ్లి చేయట్లేదనే కోపంతో... తల్లిని చంపిన కొడుకు
