74 ఏళ్ల తర్వాత దేశంలో చీతాలను ప్రవేశపెట్టిన భారత సర్కారు.. వాటి సంఖ్యను పెంచేందుకు కసరత్తులు చేస్తోంది. ఇప్పటికే నమీబియా నుంచి 8 చీతాలను భారత్కు తీసుకొచ్చిన మోదీ ప్రభుత్వం.. తాజాగా దక్షిణాఫ్రికా నుంచి మరిన్ని చీతాలను రప్పిస్తోంది. ఫిబ్రవరి 18న 12 చీతాలు దక్షిణాఫ్రికా నుంచి భారత్కు చేరుకుంటాయని కేంద్ర పర్యావరణ శాఖ మంత్రి భూపేందర్ యాదవ్ వెల్లడించారు. ఈమేరకు ప్రత్యేక వసతులతో కూడిన విమానాన్ని కేంద్రం ఆ దేశానికి పంపించింది. భారత్కు తీసుకురానున్న వాటిలో ఏడు మగ, ఐదు ఆడ చీతాలు ఉండనున్నాయి. మధ్యప్రదేశ్లోని కునో జాతీయ పార్క్కు ఈ 12 చిరుతలను అధికారులు తరలించనున్నారు.
1948లో దేశంలో చీతాలు అంతరించిపోయాయి. గతేడాది సెప్టెంబర్ 17న ప్రధానమంత్రి నరేంద్ర మోదీ తన పుట్టిన రోజు సందర్భంగా ఎనిమిది చీతాలను కునో పార్క్లోకి విడిచిపెట్టారు. వాటిలో ఐదు ఆడ, మూడు మగ చీతాలు ఉన్నాయి. దీంతో 74 ఏళ్ల సుదీర్ఘ విరామం తర్వాత చీతాలు దేశంలోకి వచ్చినట్లైంది. ప్రస్తుతం రెండో దశలో భాగంగా 12 చీతాలను రప్పిస్తున్నారు. ఈ చీతాల కోసం కునో పార్క్లో ప్రత్యేకంగా 10 ఎన్క్లోజర్లను జాతీయ పులుల సంరక్షణ అథారిటీ ఏర్పాటు చేసింది.
గురువారం ఉదయం గాజియాబాద్లోని హిండన్ వైమానిక స్థావరం నుంచి సీ17 గ్లోబ్మాస్టర్ విమానం బయలుదేరి వెళ్లింది. శనివారం ఉదయం 10 గంటలకు మధ్యప్రదేశ్లోని గ్వాలియర్ ఎయిర్ఫోర్స్ స్టేషన్కు చీతాలు చేరుకోనున్నాయని అధికారులు వెల్లడించారు. భారత్కు పంపనున్న చీతాలను దక్షిణాఫ్రికా అధికారులు క్వారంటైన్లో ఉంచారు. ప్రస్తుతం కునో పార్క్లో ఉన్న ఎనిమిది చీతాలు మంచి ఆరోగ్యంతో ఉన్నాయని అధికారులు తెలిపారు. అయితే వాటిలో ఒక ఆడ చిరుతకు క్రియాటినిన్ స్థాయిలు పెరగటం వల్ల అది అస్వస్థతకు గురైంది. అయితే చికిత్స అందించటం వల్ల ప్రస్తుతం ఆ చిరుత కోలుకున్నట్లు అధికారులు తెలిపారు.
దేశంలో కొత్త చీతాల సంఖ్య వృద్ధి చెందాలంటే కనీసం 12-14 చీతాలు అవసరమవుతాయి. శనివారం భారత్కు చేరుకొనే చీతాలను పరిగణలోకి తీసుకుంటే దేశంలో వాటి సంఖ్య 20కి చేరుతుంది. వచ్చే పదేళ్ల వరకు ఏటా 12 చీతాలను దేశంలోకి దిగుమతి చేసుకునేలా కేంద్రం ఇదివరకే ప్రణాళికలు రచించింది. ప్రపంచంలో దాదాపు 7వేలకు పైగా చీతాలు ఉన్నట్లు అంచనా. అందులో మెజారిటీ ప్రాణులు దక్షిణాఫ్రికా, నమీబియా, బోట్స్వానాలో ఉంటాయి.
