మహిళపై దాడికి తెగబడిన వైఎస్సార్సీపీ నేత - సామాజిక మాధ్యమాల్లో వీడియో వైరల్​

YSRCP Leader Attack on Woman: వైఎస్సార్​ కాంగ్రెస్​ పార్టీ నాయకుల దాష్టీకాలు పెచ్చు మీరుతున్నాయి. వారు ఎప్పుడూ ఎలా ప్రవర్తిస్తున్నారో తెలియడం లేదు. భూ కబ్జాలు, వనరుల దోపిడీ మాత్రమే కాకుండా నీచపు పనులకు కూడా తెగబడుతున్నారు. అనంతపురం జిల్లాలో తన కోర్కె తీర్చలేదనే నెపతో మహిళపై దాడికి తెగబడ్డాడు ఓ వైఎస్సార్​సీపీ నేత. అనంతపురం జిల్లా బ్రహ్మసముద్రం మండలంలోని ఓ గ్రామానికి చెందిన వైఎస్సార్సీపీ మద్దతుదారుడైన సచివాలయ కన్వీనర్ నటరాజ్ అనే వ్యక్తి,  ఓ మహిళపై దాడికి పాల్పడ్డాడు. మహిళ అని చూడకుండా విచక్షణారహితంగా జుట్టు పట్టుకుని లాగి తీవ్రంగా దాడి చేశాడు. అతను దాడి చేస్తుండగా ఆ మహిళ ప్రతిఘటించింది. ఆమె ప్రతిఘటనతో మరింత రెచ్చిపోయిన అతను, మహిళను కిందపడేసి మరి దారుణంగా దాడి చేశాడు. ప్రస్తుతం ఆ దృశ్యాలు వైరల్‌గా మారాయి. సదరు మహిళపై కన్నేసిన నటరాజ్‌,  ఆమె అంగీకరించకపోవడంతో నడిరోడ్డుపై ఈడ్చుకుంటూ దాడి చేసినట్లు తెలుస్తోంది. దాడి అడ్డుకునేందుకు స్థానికులు ప్రయత్నించగా, వారిపైన కూడా నటరాజ్​ దాడికి తెగించాడని స్థానికులు ఆరోపిస్తున్నారు.