బరితెగించిన వాలంటీర్లు- కోడ్​ ఉల్లంఘించి వైఎస్సార్సీపీ ప్రచారంలో డ్యాన్స్​లు

Volunteers Dancing in Election Campaign : రాష్ట్రంలో ఎన్నికల కోడ్ మెుదలైనప్పటి నుంచి రాజకీయ ప్రచారంలో వాలంటీర్లు పాల్గొనకూడదని ఎన్నికల సంఘం స్పష్టమైన ఆదేశాలు ఇచ్చింది. ఈ ఆదేశాలను ఏ మాత్రం లెక్కచేయకుండా వాలంటీర్లు పేట్రేగిపోతున్నారు. అసలు ప్రచారమే చేయరాదు మహాప్రభో అంటే, వైసీపీ కండువా కప్పుకొని ఆ పార్టీ పాటలకు చిందులేస్తూ దర్శనమిచ్చాడు అనిల్ కుమార్ అనే ఓ వాలంటీర్. శ్రీ సత్యసాయి జిల్లా టీకుంట్లపల్లి పంచాయితీ పరిధిలోని చెర్లోపల్లిలో వైసీపీ ఎమ్మెల్యే అభ్యర్థి దుద్దుకుంట శ్రీధర్ రెడ్డి మంగళవారం ఎన్నికల ప్రచారం నిర్వహించారు. ఈ కార్యక్రమంలో అధికార పార్టీ నాయకుల అండతో ఈసీ ఆదేశాలను తుంగలో తొక్కి ప్రచారంలో మునిగిపోయాడు ఈ వాలంటీర్. 

అదేవిధంగా జిల్లాలోని కొత్తచెరువు మండలంలోని బీసీ కాలనీలో జరిగిన వైసీపీ ఎన్నికల ప్రచారంలో ఈరోజు అర్షద్ అనే మరో వాలంటీర్ పాల్గొన్నాడు. ఇతను సైతం వైసీపీ కండువా కప్పుకొని విజిల్​లు వేస్తూ పాటలకు నృత్యాలు వేస్తున్నాడు. ఎన్నికల సంఘం ఆదేశాలను భేఖాతరు చేసి ఇలా పాల్గొనటం చూస్తుంటే వాలంటీర్లు ఎంతటికి బరితెగించారో అర్థం అవుతుంది. నిబంధనల ఉల్లంఘనలపై అక్కడక్కడ అధికారులు చర్యలు తీసుకుంటున్నా వెలుగులోకి రాని ఘటనలు అనేకం ఉన్నాయి.