నెల్లూరులో వైసీపీ నేతలే లేరు - అన్ని స్థానాలు టీడీపీ గెలుస్తుంది: మాజీ మంత్రి నారాయణ

TDP Leader Narayana Meet CBN : నెల్లూరు జిల్లాలో పదికి పది స్థానాలు, అలాగే ఎంపీ సీటు కూడా గెలుస్తామని, క్లీన్ స్వీప్ చేస్తామని తెలుగుదేశం పార్టీ సీనియర్ నేత, మాజీ మంత్రి నారాయణ స్పష్టం చేశారు. జిల్లాలో అధికార పార్టీ నేతలే లేరని ఆయన ఎద్దేవా చేశారు. తెలుగుదేశం పార్టీ అధినేత నారా చంద్రబాబు నాయుడుతో ఆయన భేటీ అయ్యారు. అనంతరం మీడియాతో మాట్లాడుతూ ఈ వ్యాఖ్యలు చేశారు.

Chandrababu Nellore Tour on March 2nd : వచ్చే నెల రెండో తేదీన చంద్రబాబు నెల్లూరు పర్యటనపై నారాయణ చర్చించారు. వైఎస్సార్సీపీ నుంచి కీలక నేతల టీడీపీలో చేరారని, రాబోయే కాలంలో కూడా చేరతారని అన్నారు. మార్చి రెండో తేదీన జరిగే చంద్రబాబు పర్యటనలో వేమిరెడ్డి ప్రభాకర్ రెడ్డి (Vemireddy Prabhakar Reddy) పార్టీలో చేరుతున్నారని తెలిపారు. జనసేనతో సీట్ల సర్దుబాటు చంద్రబాబు, పవన్ చర్చించుకుంటున్నారని అన్నారు. జిల్లాలో జనసేనకు ఏ సీటు కేటాయిస్తారనేది తమకు తెలియదని అన్నారు. సీట్ల విషయంలో చంద్రబాబు ఆదేశాలను పాటిస్తామని స్పష్టం చేశారు. బీజేపీతో కూడా చర్చలు జరుగుతున్నాయని, త్వరలోనే చంద్రబాబు స్పష్టత ఇస్తారని నారాయణ వెల్లడించారు.