ఆర్టీసీ బస్సు బోల్తా- 15 మందికి తీవ్ర గాయాలు - Rtc bus Accident

RTC Bus Bolta in Kurnool District : కర్నూలు సమీపంలోని పెద్దపాడు వద్ద ఆర్టీసీ బస్సు బోల్తా కొట్టింది. ఈ సంఘటనలో 15 మంది ప్రయాణికులకు తీవ్ర గాయాలయ్యాయి. బస్సు కండక్టర్ పరిస్థితి విషమంగా ఉంది. ప్రమాదంలో గాయపడిన ప్రయాణికులను చికిత్స నిమిత్తం కర్నూలు ప్రభుత్వ ఆసుపత్రికి తరలించారు. స్థానికుల ద్వారా సమాచారం అందుకున్న పోలీసులు సంఘటనా స్థలానికి చేరుకుని క్రేన్ సహాయంతో బస్సును అక్కడి నుంచి తరలించారు. 

పోలీసులు తెలిపిన వివరాల ప్రకారం, కర్నూలు డిపోకి చెందిన ఆర్టీసీ బస్సు 30 మంది ప్రయాణికులతో ఎమ్మిగనూరు నుంచి కర్నూలుకు బయలుదేరింది. కర్నూలు సమీపంలోకి పెద్దపాడు వద్ద బస్సు అదుపు తప్పి డివైడర్​ను ఢీకొట్టి బోల్తా పడింది. ఈ సంఘటనలో బస్సు ముందు చక్రాలు విరిగిపోయి దూరంగా పడ్డాయి. ఈ క్రమంలోనే స్థానికులు బస్సులోని ప్రయాణికులను బయటకు తీసి కాపాడారు. వీరిలో ఆరుగురు కర్నూలు ప్రభుత్వ ఆసుపత్రిలో చికిత్స పొందుతున్నారని కర్నూలు ట్రాఫిక్​ సీఐ గౌతమి తెలిపారు. ఈ సంఘటనపై కేసు నమోదు చేసి దర్యాప్తు చేస్తున్నట్లు పేర్కొన్నారు.