రోడ్డు భద్రతపై ప్రతి ఒక్కరికీ అవగాహన ఉండాలి : వైఎస్సార్​ జిల్లా అదనపు ఎస్సీ

Police Organized Road Accident Awareness Rally in YSR District : ప్రస్తుతం దేశంలో జరుగుతున్న రోడ్డు ప్రమాదాలు ఎక్కువగా డ్రైవర్ల నిర్లక్ష్యం వల్లే జరుగుతున్నాయని వైఎస్సార్​ జిల్లా అదనపు ఎస్సీ సుధాకర్​ పేర్కొన్నారు. ఈ విషయమే ఇటీవల పలు సర్వేలు కూడా వెల్లడించాయని తెలిపారు. 35వ జాతీయ రహదారి భద్రత మాసోత్సవాలను పురస్కరించుకొని కడప ఆర్టీసీ పోలీస్​ రవాణా శాఖ ఆధ్వర్యంలో అవగాహన ర్యాలీ చేపట్టారు. ఈ ర్యాలీ ట్రాఫిక్​ స్టేషన్​ నుంచి అంబేడ్కర్​ కూడలి వరకు కొనసాగింది. పోలీస్​ అధికారులు, నగరవాసులు ప్లకార్డులతో రోడ్డు నిబంధనలు పాటించాలంటూ నినాదాలు చేశారు.

ప్రమాదం వల్ల ఓ వ్యక్తి చనిపోతే బాధిత కుటుంబం మొత్తం రోడ్డు పడుతుందని ప్రజలకు సుధాకర్​ తెలిపారు. చాలా మంది రోడ్డు ప్రమాదాల పట్ల నిర్లక్ష్యంగా ఉంటారని, ఒకరి నిర్లక్ష్యం మరొకరి శాపం అవుతుందన్న విషయాన్ని అందరూ గుర్తుపెట్టుకోవాలని తెలిపారు. ముఖ్యంగా బైక్​ మీద వెళ్లే వారు హెల్మెట్​ను, కారు వాహనదారులు సీటు బెల్టు ధరించి వాహనాన్ని నడపాలని సూచించారు. మద్యం తాగి వాహనాలు నడపరాదని పేర్కొన్నారు.