ఎమ్మెల్యే కాసు మహేశ్​ రెడ్డి నిర్వాకం - అడ్డుగా ఉందని రాత్రికి రాత్రే డివైడర్​ తొలగింపు

MLA Kasu Mahesh Reddy Illegal Construction: అధికార పార్టీ నేతల అక్రమాలకు అడ్డు అదుపు లేకుండాపోతోంది. ప్రజాహితం కోసం ఏర్పాటు చేసిన రోడ్ల రూపురేఖలను సైతం దౌర్జన్యంగా తమకు అనుకూలంగా మార్చుకుంటున్నారు వైఎస్సార్​సీపీ నేతలు. అర్ధరాత్రి వేళ అక్రమాలకు దిగుతూ రాత్రికి రాత్రే పనులు చక్కపెట్టేసుకుంటున్నారు. పల్నాడు జిల్లాలో అధికార పార్టీకి చెందిన నేత తన వాణిజ్య సముదాయానికి అడ్డుగా ఉందని ప్రధాన రహదారిలోని డివైడర్​నే మాయం చేశారు. 

పల్నాడు జిల్లాలోని నరసరావుపేటలో గురజాల వైఎస్సార్​సీపీ ఎమ్మెల్యే కాసు మహేశ్​ రెడ్డి భారీ వాణిజ్య సముదాయాన్ని నిర్మిస్తున్నారు. అయితే ఈ వాణిజ్య సముదాయ దారికి, రహదారిపై ఉన్న డివైడర్​ను అడ్డుగా ఉందని గురువారం అర్థరాత్రి తొలగించారు. డివైడర్​ను తొలగింపుతో కాంప్లెక్స్​కు అనుకూలంగా దారిని ఏర్పాటైంది. ఇంత జరుగుతున్నా నరసరావుపేట మున్సిపల్ అధికారులు తమకేమీ పట్టనట్లుగా చూస్తు ఊరుకుంటున్నారని స్థానికులు ఆగ్రహం వ్యక్తం చేస్తున్నారు. మరోవైపు ఈ నిర్మాణానికి ఎటువంటి అనుమతులు లేవని, అధికార పార్టీ నేతలకు చెందినది కావడంతోనే ఎవరూ పట్టించుకోవడం లేదని విమర్శలున్నాయి. ఇప్పటి ప్రభుత్వం మారితే నిర్మాణానికి అడ్డంకులు ఏర్పడతాయని పనులు చక్కబెట్టుకుంటున్నారని స్థానికంగా చర్చ జరుగుతోంది.