వైఎస్సార్సీపీ ప్రభుత్వంలో జరిగిన కుంభకోణాలను బయటకు తీస్తున్నాం: మంత్రి లోకేశ్​ - Nara Lokesh Opened Anna Canteens

Minister Nara Lokesh Anna Canteens Were Opened: రాష్ట్రంలో అన్నక్యాంటీన్లు పునఃప్రారంభమవుతున్నాయి. ఐటీ, విద్యాశాఖ మంత్రి నారా లోకేశ్​ తన సొంత నియోజవర్గంలో రెండు చోట్ల అన్న క్యాంటీన్లను ప్రారంభించారు. గుంటూరు జిల్లా తాడేపల్లి మండలంలోని నులకపేటలో అన్న క్యాంటీన్‌ను ప్రారంభించి పేదలకు స్వయంగా అల్పాహారం వడ్డించారు. అనంతరం మంగళగిరిలో మరో అన్న క్యాంటీన్‌ను ప్రారంభించి స్థానికులతో కలసి మంత్రి లోకేశ్​ అల్పాహారం సేవించారు. ఏ ప్రభుత్వం వచ్చినా క్యాంటీన్‌ కొనసాగేలా శాశ్వత నిధి ఏర్పాటు చేస్తామని లోకేశ్​ పేర్కొన్నారు. ప్రజల విరాళాలతో అన్న క్యాంటీన్లు శాశ్వతంగా కొనసాగుతాయన్నారు. అన్న క్యాంటీన్లలో రూ.5కే అల్పాహారం, భోజనం అందిస్తున్నారు. ఆనాడు రాళ్లు, పాసు పుస్తకాలపై జగన్ ఫొటోలకు పెట్టిన ఖర్చుతో ఐదేళ్లు అన్న క్యాంటీన్లు నిర్వహించవచ్చన్నారు

Nara Lokesh Comments on YSRCP: చట్టాలు ఉల్లంఘించిన వారిని అరెస్టు చేయడం తప్పా అని మంత్రి లోకేశ్ ప్రశ్నించారు. జోగి రమేష్‌ కుమారుడు చట్టాలు ఉల్లంఘించి భూములు కొనలేదా? వైఎస్సార్సీపీ ప్రభుత్వ హయాంలో జరిగిన కుంభకోణాలను ప్రస్తుతం బయటకు తీస్తున్నామని మంత్రి లోకేశ్​ స్పష్టం చేశారు. వర్సిటీల్లో త్వరలోనే ఉప కులపతులను నియమిస్తామని ఈ సందర్భంగా మంత్రి వెల్లడించారు. ఎన్నికల హామీ మేరకు మంగళగిరిలో గోల్డ్‌ హబ్‌ పనులు ప్రారంభమయ్యాయని చెప్పారు. నియోజకవర్గంలో భూగర్భ విద్యుత్‌ కేబుళ్ల ఏర్పాటుకు సన్నాహాలు చేస్తున్నట్లు మంత్రి లోకేశ్​ వివరించారు.