ఏపీ త్వరలోనే గ్రీన్ ఎనర్జీ హబ్‌గా మారుతుంది : సీఎం చంద్రబాబు

తిరుచానూరులో ఇంటింటికి నేచురల్ గ్యాస్ సరఫరాను ప్రారంభించిన సీఎం చంద్రబాబు

Chandrababu Speech in Tiruchanur : కూటమి సర్కార్ మరో వినూత్న కార్యక్రమానికి శ్రీకారం చుట్టింది. తిరుపతిలోని తిరుచానూరులో ఇంటింటికీ పైప్‌లైన్‌ ద్వారా గ్యాస్‌ పంపిణీ పథకాన్ని సీఎం చంద్రబాబు ప్రారంభించారు. ఏజీఅండ్‌పీ సంస్థకు చెందిన గ్యాస్ సరఫరాను ఆయన ప్రారంభించారు. ఈ సందర్భంగా ముఖ్యమంత్రి ఓ వినియోగదారుడి ఇంట్లో స్టవ్ వెలిగించి స్వయంగా టీ చేసి అందించారు. వినియోగదారుడి కుటుంబసభ్యులతో కలిసి తేనీరు సేవించారు. పైప్‌లైన్‌ గ్యాస్‌, సిలిండర్ గ్యాస్‌ మధ్య తేడా గురించి వారిని అడిగి వివరాలు తెలుసుకున్నారు.

అనంతరం చంద్రబాబు పర్యావరణహిత ద్విచక్రవాహనాల ర్యాలీని జెండా ఊపి ప్రారంభించారు. ఆ తర్వాత అక్కడ ఏర్పాటు చేసిన సభలో పాల్గొని మాట్లాడారు. ఇంటింటికీ గ్యాస్‌ సరఫరాకు 2014-2019 మధ్య ప్రణాళిక వేశామని ముఖ్యమంత్రి తెలిపారు. 99 లక్షల కుటుంబాలకు గ్యాస్ సరఫరా చేసేలా ప్రణాళిక రూపొందించామని చెప్పారు. ఇందుకోసం 5 కంపెనీలను సంప్రదించినట్లు వివరించారు. 2047 నాటికి స్వర్ణాంధ్ర దిశగా పనిచేస్తున్నట్లు పేర్కొన్నారు. ఏపీ త్వరలోనే గ్రీన్ ఎనర్జీ హబ్‌గా మారుతుందన్నారు.

"భవిష్యత్​లో గ్రీన్ హైడ్రోజన్ ఉత్పత్తులు ఎగుమతి కానున్నాయి. మా రాష్ట్రానికి పుష్కలంగా సహజ వనరులు ఉన్నాయి. ఏపీకి హైవేలు, విశాల తీరప్రాంతం, పోర్టులు, విమానాశ్రయాలు ఉన్నాయి. గ్రీన్ ఎనర్జీ వల్ల అనేక ఉపయోగాలు ఉన్నాయి. జపాన్ కంపెనీల సాయంతో శ్రీసిటీని విస్తరిస్తాం. కాలుష్యరహిత సమాజం కోసం కృషి చేస్తాం. తొలుత రాయలసీమ జిల్లాలకు పైప్‌లైన్ గ్యాస్‌ సరఫరా చేస్తాం." - చంద్రబాబు, ముఖ్యమంత్రి

1999లో దేశంలోనే మొదటిసారి విద్యుత్ సంస్కరణలు తెచ్చానని చంద్రబాబు గుర్తుచేశారు. సీఎన్‌జీ ఉత్పత్తికి ఏపీ ఎంతో అనుకూలమని చెప్పారు. సౌర, వాయు, పంప్డ్‌ విద్యుత్‌ ఉత్పత్తి చేస్తున్నట్లు వివరించారు. పెట్టుబడిదారులకు స్వాగతం పలుకుతున్నామని తెలిపారు. సేంద్రియసాగుకు ఏపీ ఎంతో అనుకూలమని అందరూ సేంద్రియసాగు ఉత్పత్తులు వినియోగించాలని సూచించారు. జపాన్‌ను చూసి మనం ఎన్నో విషయాలు నేర్చుకోవాలని వెల్లడించారు. మనం చేయాల్సింది హార్డ్ వర్క్ కాదని స్మార్ట్ వర్క్ అని చంద్రబాబు వ్యాఖ్యానించారు. ఈ కార్యక్రమంలో మంత్రి బీసీ జనార్దన్‌రెడ్డి, ఇతర ప్రజాప్రతినిధులు పాల్గొన్నారు.