హెల్త్​ బాలేదని '108'కు కాల్ - కట్​చేస్తే లిక్కర్ కొనడానికి అంబులెన్స్​లో 'వైన్​షాప్'​కు - Man Used 108 For Wine

Man Used Ambulance to Buy Wine : అత్యవసర సేవల కోసం ఉపయోగించుకోవాల్సిన 108 అంబులెన్స్​ను కొందరు దుర్వినియోగం చేసుకుంటున్నారు. తాజాగా ఓ వ్యక్తి మద్యం కొనుగోలు చేయడానికి ఏకంగా అంబులెన్స్ ఉపయోగించుకున్నాడు. ఈ ఘటన నిజామాబాద్ జిల్లా బోధన్​లో చోటు చేసుకుంది. ఎడపల్లి మండలం ఏఆర్పీ క్యాంప్​నకు చెందిన శంకర్ ఆరోగ్యం బాలేదంటూ 108​కు ఫోన్ చేశాడు. సిబ్బంది వచ్చి అతన్ని బోధన్​ ప్రభుత్వాసుపత్రిలో చేర్పించారు. ఆసుపత్రి ఓపీలో వైద్య సిబ్బంది పేరు నమోదు చేసుకుని డాక్టర్ కొద్ది సేపటిలో వస్తారు కూర్చోమని చెప్పారు. 

ఈ క్రమంలో సిబ్బంది తమ పనులలో ఉండగానే శంకర్ మెల్లగా ఆసుపత్రి నుంచి కొద్ది దూరంలో ఉన్న వైన్ షాప్​కు జారుకున్నాడు. అటువైపు వెళుతున్న 108 సిబ్బందికి వైన్ షాప్​ వద్ద శంకర్ కనిపించడంతో షాక్​కు గురయ్యారు. కాళ్ల నొప్పులతో ఆసుపత్రికి వచ్చిన అతను వైన్ షాపులో మద్యం కొనుగోలు చేయడం పట్ల తీవ్ర ఆగ్రహం వ్యక్తం చేశారు. అత్యవసర సేవలను ఈ విధంగా దుర్వినియోగం చేయడం క్షమించరాని నేరమని స్థానికులు మండిపడ్డారు.