పుట్టపర్తిలో మహానగర సంకీర్తన - సత్యసాయి నామస్మరణతో మార్మోగిన ప్రశాంతి నిలయం - PRAYERS IN PRASHANTHI NILAYAM

Sathya Sai Devotees Prayers in Prashanthi Nilayam : తూర్పుగోదావరి నుంచి వచ్చిన భక్తులతో సత్యసాయి జిల్లా పుట్టపర్తిలోని ప్రశాంతి నిలయం కిక్కిరిసిపోయింది. సత్యసాయి భక్తి గీతాలను ఆలపిస్తూ, సంప్రదాయ నృత్యాలను ప్రదర్శిస్తూ భక్తులు మహానగర సంకీర్తన నిర్వహించారు. రెండు రోజుల పర్యటనలో భాగంగా తూర్పుగోదావరి నుంచి భారీ సంఖ్యలో విచ్చేసిన భక్తులు ఆధ్యాత్మికతలో మునిగితేలారు. సత్యసాయి నామస్మరణలతో ప్రశాంతి నిలయం మార్మోగింది. అనంతరం భక్తులు సత్యసాయి బాబా మహాసమాధిని దర్శించుకున్నారు. ప్రశాంతి నిలయంలో మంగళ హారతితో కార్యక్రమం ముగిసింది. సత్యసాయి మహా సమాధి దర్శనార్థం రెండు వేల మంది భక్తులు పుట్టపర్తికి తరలివచ్చినట్లు ట్రస్ట్​ నిర్వహకులు అంచనా వేస్తున్నారు.

ఈ నేపథ్యంలోనే సత్యసాయి పల్లకీని ప్రత్యేకంగా అలంకరించి భక్తి గీతాలను ఆలపిస్తూ కలశాలు చేతబట్టి బాలవికాస్ చిన్నారులు కోలాటంలో పాల్గొన్నారు. ఈ క్రమంలోనే సంప్రదాయ నృత్యాల నడుమ పట్టణ వీధుల్లో సంకీర్తన నిర్వహించారు. వీరు రెండు రోజుల పాటు సత్యసాయి సన్నిధిలో వివిధ కార్యక్రమాలు నిర్వహించారు.