పొగాకు అదనపు పంటపై జరిమానా మాఫీ- కేంద్రమంత్రి పీయూష్​కు కృతజ్ఞతలు తెలిపిన పురందేశ్వరి - PURANDESWARI MEET MINISTER PIYUSH

BJP Purandeswari Meet Union Minister Piyush Goyal: పొగాకు అదనపు పంటపై జరిమానా మాఫీ చేసినందుకు కేంద్ర వాణిజ్యశాఖ మంత్రి పీయూష్ గోయల్​కు బీజేపీ అధ్యక్షురాలు, ఎంపీ పురందేశ్వరి ధన్యవాదాలు తెలిపారు. పొగాకు రైతుల డిమాండ్లపై సానుకూలంగా స్పందించడం సంతోషంగా ఉందన్నారు. ఇటీవల పొగాకు రైతుల ఇబ్బందులపై కేంద్ర మంత్రికి ఆమె వినతి పత్రం అందజేశారు. రైతులతో సమావేశమైనప్పుడు ఆయన ఇచ్చిన హామీని గుర్తుచేశారు. ఈ నేపథ్యంలో తక్షణ చర్యలు తీసుకుని ఆ హామీని నెరవేర్చడం ఆనందంగా ఉందని పురందేశ్వరి అన్నారు. 

పీయూష్ గోయల్​ను పురందేశ్వరి మర్యాదపూర్వకంగా కలిసి కృతజ్ఞతలు తెలిపారు. రైతులకు మద్దతుగా నిలిచినందుకు పొగాకు బోర్డుకు ధన్యవాదాలు తెలిపారు. పొగాకు బోర్డు చట్టం, 1975(4 ఆఫ్ 1975) ద్వారా విధించిన పరిమితులను సడలించి ఇటీవల కేంద్ర ప్రభుత్వం ఉత్తర్వులు జారీ చేసింది. 2023-2024 పంట సీజన్‌లో వేలం కోసం రాష్ట్రంలో పేర్కొన్న చట్టంలోని సెక్షన్ 14A లోని సెక్షన్ 10సబ్-సెక్షన్(1)తో నమోదిత సాగుదారుల అదనపు ఫ్లూ క్యూర్డ్ వర్జీనియా పొగాకు పంట విక్రయించడానికి అనుమతిస్తుందని పేర్కొంది.