పార్లమెంట్‌ ఎన్నికల్లో రాష్ట్రంలో జనసేనతో పొత్తు ఉండదు : ఎంపీ లక్ష్మణ్

BJP Focus On Parliament Elections : తెలంగాణలో లోక్‌సభ ఎన్నికలు కాంగ్రెస్​కు ఏటీఎం కాబోతున్నాయని బీజేపీ ఓబీసీ మోర్చా జాతీయ అధ్యక్షుడు, ఎంపీ కె.లక్ష్మణ్​ అన్నారు. పార్లమెంట్‌ ఎన్నికల్లో రాష్ట్రంలో జనసేనతో పొత్తు ఉండదని, ఒంటరిగానే పోటీకి దిగుతామని స్పష్టం చేశారు. రాబోయే లోక్​సభ ఎన్నికల్లో తెలంగాణలో బీజేపీ రెండు అంకెల స్థానాల్లో గెలవడం ఖాయమని విశ్వాసం వ్యక్తం చేశారు. తెలంగాణలో ప్రజలంతా మార్పును కోరుకుంటున్నారని, దేశమంతా మోదీ అభివృద్ధికి మద్దతు తెలుపుతున్నారని చెప్పారు. ఇండియా కూటమి బీటల పరిణామంతోనే బిహార్​ రాజకీయాలు నడుస్తున్నాయన్నారు. బీజేపీ ఎప్పుడూ నీతీష్‌ కుమార్​పై వ్యక్తిగత విమర్శలు చేయలేదని తెలిపారు. 

MP Laxman Comments On Congress : కాళేశ్వరంలో జరిగిన అవినీతిని, దోపిడీని బయట పెడతామని చెప్పి ఇప్పుడేమో గొంతులు మూగబోతున్నాయని లక్ష్మణ్ కాంగ్రెస్​ నేతలను ఉద్దేశించి మండిపడ్డారు. సీఎం మొత్తం ప్రాజెక్టుపై విచారణ అంటే, మంత్రి మాత్రం మేడిగడ్డ వరకే ఎంక్వైరీ అంటున్నారని విమర్శించారు. కుల గణనపై కాంగ్రెస్ తీసుకున్న నిర్ణయాన్ని స్వాగతిస్తున్నట్లు కె.లక్ష్మణ్ తెలిపారు.